Oferese Rai Ba Alfandega, PM Agradese Komunidade Batugade

Primeiru Ministru (PM), Kay Rala Xanana Gusmão asina plaka iha Batugade. (Foto: Media GPM)

DILI, STLTIMORLESTE.com – Primeiru Ministru (PM), Kay Rala Xanana Gusmão agradese bá komunidade iha Aldeia Batugade Vila, Suku Batugade, Postu Administrativu Balibo, Munisipiu Bobonaro, tanba oferese rai hektares 1 resin bá Autoridade Aduaneiru hodi instala kampaun ba fatin servisu no deskansa iha fronteira.

Rai nee komunidade oferese iha 28 Janeiru tinan 2010 no Sentidu agradesimentu nee Primeiru Ministru espresa liu husi asinatura no entrega plaka neebé sei hatuur iha Kampaun Alfândega Batugade.

“Ida nee kontribuisaun kapás husi ita nia komunidade Batugade bá dezenvolvimentu ita nia rai”, katak PM, Xanana Gusmão liu husi komunikadu neebe STL asesu Tersa nee (28/01/2025).

Xefe Governu dehan, ohin mai asina tiha no lee fali katak aban halo tinan 15, komunidade entrega rai ne’e. Tanba ne PM tenke mai duni atu agradese bá povu. Ida neee hatudu katak, povu Batugade kompreende diak tebes mak oferese fatin ida ho medida boot tebes atu Alfândega hela hodi halo servisu.

Lori komunidade Batugade nia naran hameno bá parte Alfândega katak, hetan ona fatin diak ida atu deskansa, maibé buat ida importante liu bá Alfândega mak iha fatin neebé deit tenke halo servisu no servisu ho rigór, tenke halo kontrolu bá kualkér sasan neebé tama no sai liu husi fronteira.

“Ida nee mak hau husu no hau ejize bá Alfândega tenke kuidadu tebes ho seguransa nasionál ne’ebé iha ligasaun direta ho reseita bá Estadu Timor Leste”, tenik PM Xanana.

Partisipa iha serimónia simu plaka nee mak Komisáriu Alfândega, Joanico Pinto ho estrutura inklui funsionáriu sira, autoridade sira husi Postu Administrativu Balibo, autoridade lokál no komunidade Batugade Vila.

(alb)

Share it :

Leave a Reply

Your email address will not be published. Required fields are marked *