Orsamentu Dapur Kantina Matak Palasiu Prezidensial Republika Husi Governu

Prezidente Republika (PR), Jose Ramos Horta. (Foto: STL/Emerenciana Pinto)

DILI, STLTIMORLESTE.com – Prezidente Republika (PR), José Ramos Horta hatete, Kantina Matak iha Palasiu Prezidensial nee apoiu orsamentu husi Governu liu husi Orsamentu Jeral Estadu (OJE).

Prezidente Republika José Ramos Horta hatoo lia hirak nee liu husi nia diskursu iha Palasiu Prezidensial Nicolau Lobato, Bairo Pite, Dili, Tersa (28/01/2025).

“Programa Kantina Matak nee 100% Orsamentu Jeral Estadu, nee laos orsamentu pesoal Prezidente Republika nian, nee komitmentu mai husi Governu mai husi Estadu, Governu no Primeiru Ministru apoiu dezde primeiru hau nia mandatu iha servisu ida nee,” katak PR, Horta.

Xefe Estadu dehan, Kantina Matak hahu husi Segunda too Sesta, no iha tan programa 4 hanesan ida iha Bidau Santana, ida iha Eskola Labeh no ida iha Oekusi, Kantina Matak akomula labarik besik ona rihun ida.

“Akumula labarik besik rihun ida, han diak los, laos han supermi ka migoren, no pop mie lae, pop mie hau mos han kuandu ba foho tuur halimar han, dala ida ami nain rua Kardeal tuur besik Same nee han pop mie, maibe nee laiha nutrisaun, maibe nutrisaun mak manutolu, koto, modo tahan nee tenke han loron-loron, Kantina Matak menu mak ida nee, menu neebe aprova husi Ministeriu Saude nutritisiva sira haree, nee 100% prezidensia nia,” katak nia.

Nia dehan, laos nee deit, ataf husi Prezidensia liu husi Sosiedade Sivil kontinua ba munisipiu hodi buka apoiu ema neebe moris kiak rabat rai, labele hein milagre ruma, labele hein dezenvolvimentu.

“Husi atividade sira nee ema balu hatete nee la rezolve problema, nee falhansu politika, falhansu Governu hau haree sira, maibe buatomak no buitinak sira hakerek nee nunka fo duit metan ida ba sira nia vizinhu rasik, hau laos atu rezolve nasaun tomak nia problema, nee problema Governu nia sei lori tempu nee iha mundu hotu-hotu, maibe hau hatete se hau bele ajuda ema oan ida bele ajuda 10 diak liu tan, se ajuda rihun ida nee diak liu tan bele ajuda nee mak Prezidente buka halo,” hatete Xefe Estadu.

(eme)

Share it :

Leave a Reply

Your email address will not be published. Required fields are marked *