DILI, STLTIMORLESTE.com – Deklarasaun neebe husi membru Parlamentu Nasional balu neebe kestiona dignidade povu simu osan subsidiu US$ 200 hetan kritika makaas. Polemika nee mosu tanba apoiu finanseiru husi Governu nee nuudar direitu sidadaun nian neebe mai husi kofre estadu, laos fali esmola ka favour pesoal husi elite politika sira.
Haree ba kestaun nee, parte akademista sira fo sira nia komentariu hodi kestiona papel no responsabilidade etika, husi husi Reprezentante povu nian iha Uma Fukun Parlamentu Nasional.
Tuir Akademista UNTL, Jacinto Soares Magno katak, osan neebe Governu fahe ba povu mai husi kofre estadu ka publiku neebe nuudar riku soin povu nian rasik. Tanba nee bainhira governu fo hodi hasae netik kresimentu finanseiru família ka uma kain nian, nee labele hodi uza julga fali ba sidadaun sira nia dignidade.
“Dignidade povu nian labele sukat ho osan US$ 200. Povu simu tanba nee sira nia direitu nuudar sidadaun iha dituasaun ekonomia neebe susar. Deputadu sira mak tenke hatudu fali sira nia dignidade hodi kria lejislasaun neebe diak liu hodi hasae moris povu nian, laos halo fali deklarasaun neebe hatun fali povu,” dehan Jacinto ba STL, iha Kaikoli, Dili, Kuarta nee (24/06/2026).
Akademista nee sublina tan katak, lia fuan sira nee hatudu distansia boot entre elite politika ho realidade moris povu nian iha baze. Iha situasaun neebe folin sasan sae no kampu servisu menus, apoiu finanseiru maski uituan mos sai kbiit boot ba povu hodi sosa nesesidade bazika hanesan foos, mina sona no seluk tan.
Iha parte ketak Observador Politika, Manuel Sarmento mos espresa nia laran la satisfas ho atitude no deklarasaun neebe fo sai husi membru Parlamentu Nasional (PN) sira nee.
Tuir nia nembru PN sira labele lori povu nia dependensia ekonomia, hodi sai fali material hodi hatun fali sidadaun sira nia dignidade.
“Hau la satisfas duni ho deklarasaun sira hanesan nee. Se Deputadu sira la satisfas ho politika subsidiu, sira tenke kestiona Governasaun no kria lei hodi kria kampu servisu, laos fali kria polemika neebe fo trauma ba povu kiik,” dehan nia.
(car)
