DILI, STLTIMORLESTE.com – Reprezentante Santa Se iha Timor Leste, Monsenhor Marco Sprizzi hatete, Sua Santidade Papa Francisco nia saude la kritiku ona.
Reprezentante Santa Se iha Timor Leste, Monsenhor Marco Sprizzi hatoo kestaun nee ba jornalista sira, bainhira remata halo enkontru despedida ho Prezidente Republika, Jose Ramos Horta iha Palasiu Prezidensial Nicolau Lobato, Bairo Pite, Dili, Sesta (28/02/2025).
Monsenhor dehan, durante enkontru koalia mos kona-ba Sua Santidade Papa Francisco nia saude neebe oras nee la kritiku ona, espera katak ho grasa Maromak nian Sua Santidade bele rekopera lalais.
“Ami mos koalia no asina ho ksolok, tanba Santu Padre ohin rekupera hela, boletin ikus liu neebe fo sai husi mediku sira horikalan hatete katak Amu Papa nia kondisaun laos krítiku ona too agora, mediku sira hatete ona katak Amu Papa nia kondisaun laos krítiku ona, signifika katak nia tama ona iha faze krítiku, faze estabilizasaun nian. Nia sei iha hela hospital nuudar prekausaun tanba nesesidade ba tratamentu sira neebe kualifikadu tebes, maibe ami iha konfiansa tebes katak Santu Padre sei fila hikas ba Vatikanu, hau sei hasoru nia bainhira nia fila fali ho afetu Timoroan sira nian dala ida tan no lori Francisco ba almosu,” dehan Monsenhor.
Monsenhor dehan, nia mos iha esperansa katak Sua Santidade sei bele rekopera husi moras neebe iha, no bele hasoru malu iha vatikanu.
Nia hatutan, iha hasoru malu nee lider nain rua mos diskute kona-ba Sua Santidade Papa Francisco nia saude neebe la kritiku ona.
“Hau dehan katak Prezidente sempre iha kontaktu ho hau loron-loron kona-ba atualizasaun sira no klaru katak hau sei lori ba Santu Padre. Hanesan hau dehan ona, afetu husi Timoroan hotu, husi Prezidente, husi bispu sira, husi Primeiru Ministru no imi hotu, tanba Amu Papa sempre dehan katak rikusoin boot liu husi Timor Leste mak ninia povu, tanba nee mak prezidente koalia nuudar reprezentante husi povu Timor tomak,” katak nia.
Nia dehan, maske nia despedida ho Prezidente, Governu no povu Timor Leste, maibe nia nafatin iha nia orasaun, tanba durante nia hamutuk Timoroan sira hatudu sira nia maturidade no kolaborasaun neebe diak tebes.
“Hau hakarak hatutan buat ruma neebe hau sei lori nafatin iha hau nia fuan, Timor Lorosae hau sei la haluha afetu, domin no hamnasa husi ema Timoroan idak-idak neebe hau hasoru iha tinan hirak nia laran, laos deit iha Dili, hau vizita area remota barak, kapela sira, aldeia sira iha rai laran, no hau sei lori sira hotu hamutuk ho hau iha hau nia fuan iha Vatikanu,” katak nia.
(eme)
