DILI, STLTIMORLESTE.com – Bankada Partidu Demokratiku (PD) iha Parlamentu Nasionál (PN) husu Primeiru-Ministru (PM) Kay Rala Xanana Gusmão atu foti lalais desizaun kona-ba nomeasaun Ministru Ensinu Superior, Siénsia no Kultura (MESSK) foun.
Deputadu Bankada PD, Armando Lopes hato’o pedidu ne’e ba jornalista sira iha Parlamentu Nasionál, Kuarta (16/09/2026).
Armando hateten, PD husu Vise-Primeiru-Ministru Asuntu Sosiais atu koordena ho Primeiru-Ministru, hodi acelera prosesu nomeasaun, tanba lista kandidatu hamutuk ema nain-10 aprezenta ona ba Primeiru-Ministru.
“Foin lalais ne’e ami ko’alia hela iha reuniaun Komisaun nian no ami husu ba Vise-Primeiru-Ministru Asuntu Sosiais atu husu Primeiru-Ministru atu acelera no determina ona lista kandidatu nain-10 ne’ebé aprezenta ona ba Primeiru-Ministru,” hatete Armando.
Tuir Armando, nomeasaun Ministru MESSK presiza halo lalais, liuliu tanba Parlamentu Nasionál besik atu hahú debate Orsamentu Jerál Estadu (OJE) 2027.
Nia hateten katak, presensa Ministru permanente iha MESSK importante atu bele aprezenta no defende programa no orsamentu Ministériu nian durante prosesu debate OJE.
“Ami mós foin lalais husu ba Vise-Primeiru-Ministru atu acelera, tanba orsamentu jerál estadu mai ne’e, pelumenus Ministru ida iha ona hodi foka ba programa MESSK nian no atende programa ho orsamentu ne’ebé iha,” dehan nia.
PLP Mós Husu Nomeasaun Lalais
Enkuantu ne’e, Xefe Bankada Partidu Libertasaun Popular (PLP), Maria Angelina Sarmento, mós sujere ba Primeiru-Ministru atu nomeia lalais Ministru MESSK foun, hodi garante lideransa no implementasaun programa Governu nian.
“Ministériu Ensinu Superior, ha’u hanoin presiza tebes lider másimu ida atu lidera instituisaun ida-ne’e, atu nune’e ita bele fó oportunidade ba Ministériu ne’e hodi bele implementa nia programa sira. Atu to’o iha fim mandatu tinan-lima hosi IX Governu Konstitusionál, programa sira ne’ebé reintegra ona iha tinan-lima bele implementa ho di’ak,” hatete Maria Angelina.
Nia subliña katak MESSK iha responsabilidade importante kona-ba universidade no ensinu superior, no lideransa ministériu nian presiza garante kontrolu, monitorizasaun no supervizaun ba servisu sira.
“Se laiha lideransa máximu ida atu kontrola, monitoriza no superviziona servisu sira hosi universidade nian, oinsá mak ita bele garante Timor-Leste atu prodús rekursu umanu ne’ebé kualifikadu?” dehan nia.
PD Aprezenta Lista Kandidatu Nain-10
Antes ne’e, Prezidenti Partidu Demokratiku no atual Vise-Primeiru-Ministru Asuntu Sosiais, Mariano Assanami Sabino, hateten katak PD aprezenta ona lista kandidatu nain-10 ba Primeiru-Ministru Kay Rala Xanana Gusmão, atu konsidera ba pozisaun Ministru MESSK, hodi substitui ministru anteriór, José Honório da Costa Pereira.
Lista kandidatu nain-10 ne’ebé PD aprezenta, tuir informasaun hosi partidu, mak:
- Pedro Ximenes – Reitór IOB, nivel S3 (Doutoramentu);
- Florindo Pereira – nivel S3 (Doutoramentu), eis membru Governu no Reitór UNITAL;
- João Martins – nivel S3 (Doutoramentu), dosente no Reitór UNTL;
- José Boavida Simões – nivel S2 (Mestradu), Xefe Gabinete MESSK;
- Rosena Martins – nivel S3 (Doutoramentu), dosente UNTL;
- José Meneses – nivel S2 (Mestradu), Diretór Fundasaun UNPAZ;
- Teresa Maria de Carvalho – nivel S2 (Mestradu), asesora MESSK;
- Cristino Gusmão – nivel S3 (Doutoramentu), Diretór Nasionál no dosente UNPAZ;
- Filipus Nino Pereira – nivel S2 (Mestradu), Ministru MCI;
- Augusto Júnior Trindade – nivel S2 (Mestradu), Vise-Ministru MCI.
PD no PLP konsidera nomeasaun Ministru MESSK importante iha kontestu preparasaun ba OJE 2027 no implementasaun programa Governu nian iha área ensinu superior, siénsia no kultura.
(alb)
