DILI, STLTIMORLESTE.com – Primeiru Ministru (PM), Kay Rala Xanana Gusmão husu ba Ministra Edukasaun (ME), Dulce de Jesus Soares tau atensaun ba profesores sira, tanba sira mak edukador neebe motiva nafatin estudante sira.
Xefe Governu hatoo kestaun nee bainhira partisipa iha natal konjunta hamutuk ho profesores husi Munisipiu Dili, hahu husi nível pre eskolar, ensinu baziku, sekundariu no tekvo, ho tema “Fahe Rezultadus Neebe Alkansa Ona no Dezafius Neebe Enfrenta Durante 2024”, divulga planu asaun anual no orsamentu ME ba tinan 2025 iha CCD, Segunda nee (06/01/2025).
“Buat hotu-hotu ita bele halo, servisu saida deit mak ita bele halo iha rua, ida mak saude, ida mak edukasaun, buat rua nee mak kompleta malu tebes, tanba iha misaun boot tebes, iha ita nian hahalok no iha ita nian vontade atu fo, futuru TL nian depende ba imi, tanba labarik sira neebe imi forma daudaun sei lori Timor ba oin, nee mak bolu dehan misaun, hanesan mos saude, ema ida ou labarik ida matenek tebes, maibe saude laiha nia mate, imi nia misaun nee laos hanorin A, B no C, 1 no 2, maibe hanorin mos mentalidade, edukasaun importante tebes-tebes, nee iha imi nia liman futuru Timor ninia,” tenik nia.
Xefe Governu apresia ho profesores sira nia partisipasaun dezenvolvimentu ba rai nee nian liu husi edukasaun, mais husu ba profesores tomak hadomi fo ajuda hadia labarik sira nia mentalidade, husi profesores sira mak kria mentalidade nee ho moral nee makaas sei sai boot, edukasaun nee importante tebes-tebes.
Ho domin ho matenek neebe profesor sira fo ba estudante sira, ida nee mak misaun nuudar profesores, nee duni ho respeitu tomak hakuak boot ba profesor sira hotu, fiar katak profesor sira futuru Timor nian sei sai diak liu.
(jac)
