DILI, STLTIMORLESTE.com – Bankada CNRT liu husi Deputadu Patrocinio Fernandes hateten, Primeiru Ministru (PM) Kay Rala Xanana Gusmão iha kompetensia atu hapara Prezidente Autoridade (PA) RAEOA no nomeia fila fila PA foun.
Patrocinio hatete, nia seidauk lee despaisu kona-ba nomeisaun ba Prezidente Autoridade mandatu durante tinan hira neebe nia seidauk pronunsia kona-ba mandatu PA RAEOA nian.
Tuir nia, Prezidente Autoridade RAEOA tuir estatutu rasik nee kompetensia Primeiru Ministru nian, entaun iha situasaun normal periodikamente tuir saida mak lei hatur ona.
Tanba nee Xefe Governu mak bele iha kompetensia atu hapara no nomeia fila fali Prezidente Autoridade RAEOA foun atu lidera Atoni oan sira.
“Maibe iha situasaun seluk regras normal no regras iha fatin hotu-hotu katak, se mak iha kompetensia atu nomeia, nia mak bele nomeia, nia mos mak iha kompetensia atu bele hapara iha kualker momentu,” hatete Deputadu Patrocinio Fernandes ba jornalista sira hafoin remata Komisaun A iha resintu PN, Kuarta (04/06/2025).
Nia hatutan, se deit bele sai PA RAEOA, importante asumi kargu ho responsabilidade hodi bele tau matan ba populasaun sira nia preokupasaun.
“Sai PA RAEOA bele se deit, maibe nia bele servi povu nee ho diak, servi tuir espetativa povu nian, tuir lei sira neebe mak vigora, ida nee mak reprezentante povu sira nia hakarak,” dehan nia.
Maibe nia lakohi fo komentariu kona-ba prosesu dezenvolvimentu neebe oras nee lao hela iha Oekusi, tanba durante nee nia ladun halo fiskalizasaun ba iha RAEOA.
“Hau hanoin hau labele koalia buat ida hau haree husi dook deit, durante Prezidente Autoridade RAEOA, hau kala ba Oekusi dala rua deit, servisu seluk ladun iha oportunidade atu bele haree buat hotu-hotu hodi bele halo avaliasaun ida neebe prematura kona-ba saida mak diak no la diak,” nia hatete.
“Maibe hau hanoin katak governu sentral mak akompanha diak sira nia servisu loron-loron, tanba parte ezekutivu nian, governu sentral mak iha avaliasaun ida adekuadu para bele haree katak iha progresu ga la iha progresu ba mandatu PA RAEOA nian,” nia hakotu.
(alb)
