DILI, STLTIMORLESTE.com – Polisia Nasional Timor Leste (PNTL) liu husi Departamentu Investigasaun Kriminal Nasional (DIKN) kontinua buka tuir autor sira neebe envolve iha kazu Kasnafar, neebe viral iha Media sosial (MedSos).
Xefe Departamentu Investigasaun Kriminal Nasional (DIKN), Superintendente João Belo dos Reis dehan, bazeia ba publikasaun vidio neebe viral iha Media sosial horiseik, PNTL liu husi DIKN halo ona esforsu hotu-hotu.
“Ita aprosima ba familia para bele hatoo keixa mai iha DIKN no vitima ita lori ona ba uma Mahon,” hatete Superintendente João Belo ba jornalista sira iha Komando Jeral PNTL, Dili, Kuarta (11/12/2024).
Maibe nia dehan, DIKN sei buka tuir autor sira neebe envolve iha laran, para responsabiliza sira nia asaun neebe halo ba vitima.
“Ami bele hatene esforsu hotu-hotu ita halo ba sira neebe direita no indireita involve kazu nee, ita sei buka tuir hotu kedas lori mai tuir prosesu investigasaun, tanba kazu nee krimi, tanba nee ameasa ba vida humanu nian,” nia deklara.
Nia esplika, investigasaun mak sei deterima, se se mak envolve ba kazu nee, no sira sei responsabilidade ba hahalok sira neebe sira halo na vitima.
Tuir observasaun jornalsita STL iha terrenu katak, kazu Kasnafar neebe viral iha media sosial daudaun nee suspeitu nain ida PNTL liu husi DIKN kaptura ona, lori ona mai Komando Jeral PNTL hodi tuir prosesu investigasaun.
(jen)
