DILI, STLTIMORLESTE.com – Tuir dadus neebe Komando Polísia Nasionál Timor Leste (PNTL) liu husi Departamentu Tranzitu Seguransa Rodoviariu Nasionál (DTSRN) rejista kazu hamutuk 211 no ema nain 5 mak lakon vida iha fulan Maiu nia laran.
“Hahu husi dia 1 Maiu too 31 Maiu 2025, atualiza dadus neebe polísia tranzitu nasional rekolha iha munisipiu sira katak, durante fulan ida nia laran nee ita rejista kazu hamutuk 203, lakon vida nain 5, kanek todan 29, kanek kmaan na’in 211,” hatete Diretór Nasional Tranzitu Seguransa Rodoviariu Nasionál, Superintendente Asistente, Luís da Costa ba jornalista sira iha knaar fatin Komando Jerál PNTL Dili, Segunda (09/06/2025).
Nia dehan, husi kazu sira nee iha kazu ida mak konklui ona iha Tribunál, prosesu iha Tribunal iha tolu, sei iha prosesu nia laran hamutuk 111 no rezolve anivel infrator hamutuk 88, fator neebe dominante iha via públiku husi umanu.
Enkuantu, husi Asistente ne’e vitima ida mak lakon vida bainhira halo tratamentu iha Hospital Nasional Guido Valadares (HNGV), ida ain tohar no seluk hetan mós pankada.
Entretantu, tuir informasaun neebe STL asesu katak, sidadaun Saturnina Pereira neebe hetan asidente iha Area Ponte III Komoro, iha loron Kinta (05/06/2025) iha dader 02.30 hakotu ona iis iha HNGV.
Iha mos asidente nee, membru PNTL ida uza kareta eskoltu konduz ho velosidade makaas hodi soke motorizada rua neebe rezulta Saturnina Pereira no Celina da Silva hetan kanek iha parte ulun no hirus matan ruin tohar.
Nunee, iha akontesimentu nee vitima nain 2 evakua kedas ba HNGV hodi halo tratamentu. Maibe iha Kinta (05/06/2025) Saturnina Pereira la konsege Salva no hakotu iis iha HNGV, enkuantu Celina da Silva kontinua halo Tratamentu.
(jen)
