BAUKAU, STLTIMORLESTE.com – Komando Polisia Munisipiu Baukau simu ona despaisu husi Komando Jeral Polisia Nasional Timor Leste (PNTL) sei aplika “Alerta Dois ka 2” iha ambitu selebrasaun Natal no tinan foun iha Baukau.
“Hanesan seguransa Estadu nian, Komando Jeral mos hatun ona despaisu mai kona-ba loron boot Natal no tinan foun, ita aplika Alerta Dois tuir orientasaun Komando Jeral,” informa Komadante Komando Polisia Baukau, Superintendente Xefe Polisia, Antonio Maria de Sa ba jornalista sira, iha Vila Nova, Baukau, Kuarta (11/12/2024).
Tanba tuir nia atu fo susesu ba despaisu husi Komando Jeral, mak Komando Polisia Baukau hamutuk ho entidades sira hanesan lider Arte Marsiais sira, Xefe Suku, Autoridade Postu no veteranus sira inisia ona dialogu ho jovem sira iha kada Suku atu kria paz no estabilidade iha selebrasaun nee.
Nunee planu Polisia Munisipiu Baukau nian ba loron nee, sei patrolhamentu masimu liu tan ba iha fatin sira neebe risku ba konfrontu, iha neebe indentika ona no la permite sidadaun sira konsumu alkholika iha estrada publiku, tanba bele hamosu problema.
Husi parte seguransa mos sei destaka membru Polisia sira iha fatin Igreja hodi asegura no liimita sarani sira sunu fugetis iha resintu Igreja durante selebrasaun eventu misa lao hela, tanba Estadu bandu.
Maibe parte seguransa Polisia Baukau garante durante selebrasaun eventu Natal no tinan foun sei la akontese insidente sira liu liu komfrontu entre jovem sira, tanba selebrasaun loron finadu tinan nee, Baukau Oan liu liu jovem sira kontribui no koopera neebe la hamosu konflitu ho volume boot hanesan tinan hirak ba kotuk.
(EST 2)
