DILI, STLTIMORLESTE.com – Prezidente Republika (PR), Jose Ramos Horta entrega Premiu Direitu Umanu Sergio Vieira de Mello Edisaun 17 ba Vensedor nain lima.
Premiu Direitu Umanu Sérgio Vieira de Mello nuudar inisiativa neebe lansa iha tinan 2008 husi Prezidente Republika, Jose Ramos Horta, ho objetivu atu Rekonhese kontribuisaun husi sidadaun Timoroan, sidadaun estranjeiru, organizasaun governamental ka naun-governamental sira, ba prosesu promosaun, protesaun no defeza direitus umanus iha Timor Leste.
Premiu sira nee fo iha kategoria rua neebe diferente, mak iha Direitu Sivíl no Polítiku, neebe fo ba indivídu no organizasaun sira neebe fo kontribuisaun notavel ba promosaun no protesaun direitu sivíl no polítiku sira iha nasaun. Iha Direitu Ekonomiku, Sosial no Kultural, atribui ba sira neebe mak fo ona kontribuisaun signifikativu ba promosaun no defeza Direitu Ekonomiku, Sosial no Kultural.
Vensedor sira ba tinan ida nee iha kategoria Direitu Ekonomiku, Sosial no Kultural mak hanesan Viquiano Gama da Costa, no Sentru Dezenvolvimentu Inkluzivu, Padre Augusto Hermenegildo Nunes OFM, Conv, Hipólito Alves dos Santos no Ezequiel Fernandes de Oliveira.
Iha biban nee, Prezidente Republika, Jose Ramos Horta ba jornalista iha palasiu Tersa (10/12/2024) hatete, fo onra ba individual no organizasaun notavel sira neebe hatudu ona kompromisu metin hodi avansa direitus umanus nasaun.
Prezidente dehan, sira nia dedikasaun hodi promove no proteje direitu sivíl no polítiku sira reprezenta duni espíritu husi Premiu ida nee no legadu Sergio Vieira de Mello nian, no bazeia ba Dekretu-Lei No. 15/2009 loron 18 fulan Marsu, vensedor idak-idak simu sertifikadu no premiu osan hamutuk US$ 10,000.
“Premiu nee 10 Dezembru 2024 sira hotu-hotu neebe simu iha kategoria direitu ekonomiku sosial no kulturais laos iha direitu sivil no politiku, hau hatete ba hau nia staf ita haree kada premiu kandidatu nee nia la monu iha direitu sivil politiku, maibe monu iha ekonomia sosial no kulturais, tratadu rua nee internasional,” katak PR Horta.
Nunee mos Manan nain, Hipólito Alves dos Santos sente onradu no agradese ba parte hotu, tanba husi Maromak nia bensaun no husi uma lisan hotu neebe mak bele haraik bensaun ba sira ohin bele simu premiu ida nee.
“Hanesan premiadu neebe ohin simu sente kontente ho responsabilidade tomak, tanba ita hatene katak premiu neebe ohin ami simu nee kona-ba direitu ekonomia sosial no kultura, signifika katak ita nia prosesu barak ba oin sei iha ita luta foun sei iha, liu-liu ita boot sira hatene katak ita nia problema dezempregu sei iha, violasaun direitus umanus sei iha, entaun hanesan premiadu simu ho onradu no responsabilidade,” katak nia.
(eme)
