PR Horta – Embaixador Oliver Diskute Kooperasaun Iha Setor Investimentu

Prezidente Republika (PR), Jose Ramos hasoru malu ho Embaixador Suisa iha Timor Leste, Olivier Zehnder. (Foto: Media PR)

DILI, STLTIMORLESTE.com – Prezidente Republika (PR), Jose Ramos hasoru malu ho Embaixador Suisa iha Timor Leste, Olivier Zehnder, diskute kona-ba kooperasaun iha setor investimentu.

Bainhira remata hasoru malu, Embaixadór Suisa iha Timor Leste, Olivier Zehnder ba jornalista iha Palasiu Prezidensial, Bairo Pite, Tersa kalan (28/01/2025) hatete, hasoru malu ho Prezidente Republika Jose Ramos Horta, koalia kona-ba kooperasaun entre nasaun rua iha area oin-oin, liu-liu iha area investimentu.

“Hau onra boot hasoru malu ho Prezidente Republika, hasoru malu ona ho nia. Dala ikus, nia mak belun ida husi Suisa. Nia hela iha Suisa. Nia mos servisu barak iha ONU. Iha enkontru nee ami koalia kona-ba asuntu oin-oin liu-liu kona-ba area investimentu,” katak Embaixador.

Nia hatete, iha hasoru malu nee koalia mos kona-ba asuntu ONU nian, asuntu jeopolítiku, depois dezafiu sira neebe ohin loron kada nasaun hasoru no koalia importansia demokrasia nian, saida mak bele halo hamutuk nuudar parseiru hodi promove demokrasia iha mundu tomak.

Embaixador dehan, iha hasoru malu nee koalia mos kona-ba investimentu sira neebe sei halo iha Timor Leste importante tanba bele hadia ekonomia.

“koalia kona-ba importansia atu investe iha ita boot nia rain. Entaun ida nee laos servisu ida neebe fásil. Ita presiza halo setor privadu sira interese liu ba Timor Leste, ka Timor Leste tenke atrai setor privadu sira mai iha nee hodi sosa produtu TL nia,” katak nia.

Nia haktuir tan katak, emprezariu Suisa balu mos harii ona sira nia empreza iha Tibar, no ida nee hanesan kooperasaun ida neebe diak.

Prezidente Republika Jose Ramos Horta sente kontente bele hasoru malu ho Embaixador Suisa iha Timor Leste, Olivier Zehnder, diskute kona-ba kooperasaun iha setor investimentu.

Iha biban nee Prezidente Republika koalia kona-ba xokolate no kafe husi Timor Leste, no hanoin karik nee produtu sira neebe bele esporta ba Suisa.

Entretantu, Xefe Estadu mos hein katak nasaun rua nee iha nafatin kompromisu hodi estabelese kooperasaun no respeitu ba malu.

(eme)

Share it :

Leave a Reply

Your email address will not be published. Required fields are marked *