DILI, STLTIMORLESTE.com – Prezidente Republika (PR), Jose Ramos Horta entrega motorizada ida ba Ema ho Defisiensia (EhD), Flavio R. X Maia, iha kantina matak palasiu.
Ema ho Defisiensia, Flavio R.X Maia ba jornalista sira iha kantina matak Palasiu Prezidensial Nikolao Lobato, Bairo Pite, Kuarta nee (04/06/2025) hatoo agradese ba Prezidente Republika Jose Ramos Horta tanba bele apoiu ona motorizada ba nia hodi tulun nia hodi halo atividade loron-loron nia.
“Dala uluk atan hau hatoo obrigadu barak tanba durante nee hetan apoiu dala barak ona husi Prezidente, hau hetan apoiu hamutuk ida nee ba dala rua, primeiru hau hetan apoiu fundus husi Prezidente US$ 1000 halo resiklajen, solda no hola bazu aifunan sira no seluk tan,” dehan Flavio.
Flavio dehan, dala ruma mos uza osan neebe nia hetan hodi hadia fali sasan neebe laiha funsaun hanesan meza ain tohar bele solda fali no agora hetan tan motor apoiu ba dala rua ona.
“Tanba nee hau hatoo agradese tebes, tanba dala rua ona hau hetan apoiu husi Prezidente, karik ba futuru hakarak husu Prezidente ajuda mos hau nia kolega sira seluk neebe aat liu hau, ou sira neebe presiza mos apoiu hanesan mos hau, hau nia kolega barak presiza hela maibe sira atu hakat too mai nee laiha ema ruma apoiu atu lori sira mai hasoru Prezidente,” dehan nia.
Iha biban nee nia mos hatoo agradese ba mana Bella Galhos tanba ho nia bele hasoru malu ho Prezidente Republika, no buat neebe nia mehi bele hetan duni no realiza iha nia moris. “Ho mana Bela nia diak no esforsu ohin loron hau hetan duni motor,” katak nia.
Nia hatete, nia atividade loron-loron mak nuudar soldador, solda besi, hanesan solda meza, kadeira no seluk tan.
Nia hatete, durante nee nunka hetan apoiu husi ministeriu ruma maibe so Prezidente Republika Jose Ramos Horta mak apoiu nia dala rua ona.
(eme)
