DILI, STLTIMORLESTE.com – Prezidente Republika (PR), Jose Ramos fo pose ba Marcos dos Reis da Costa asumi kargu nuudar Embaixador Timor Leste ba Reinu Kambodia.
Iha loron Segunda nee (09/06/2025) Prezidente Republika fo pose ba Marcos dos Reis da Costa nuudar Embaixador Estraordinariu no Plenipotentiariu Republika Demokratika Timor Leste ba Reinu Kambodia. Serimonia nee realiza iha Palasiu Prezidensial Nicolau Lobato.
Embaixador Marcos lori esperiensia diplomatika distintu liu dekada rua ba nomeasaun istoriku ida nee. Nia hola parte iha joven diplomata nain 50 dahuluk neebe rekruta hodi estabelese Ministeriu Negosiu Estranjeiru Timor Leste nian iha tinan 2000 no ofisialmente hahu iha independensia tinan 2002. Agora daudaun halao knaar nuudar Diretor Jeral ba Asuntu Bilateral sira ba Azia no Oseania iha Ministeriu Negosiu Estranjeiru no Kooperasaun hahu husi Agostu 2023. Durante nia karreira, nia servisu iha postu diplomatiku xave sira inklui Segundu Sekretariu iha Malazia, Primeiru Sekretariu iha Gabinete ONU nian iha Genebra, no Konselleiru iha Jakarta. Nia iha Mestradu Ezekutivu Relasaun Internasional sira hosi Eskola Diplomasia Genebra nian.
Nomeasaun nee reprezenta marka istoriku ida iha relasaun diplomatika entre Timor Leste no Kambodia hafoin vizita ofisial foin lalais nee husi Prezidente Senadu no Eis Primeiru Ministru Kambodia nian, Samdech Akka Moha Sena Padei Techo Hun Sen, mai Timor Leste, estabelesimentu Embaixada Kambodia nian iha Dili no aprezentasaun kredensial husi Embaixador Chun Sovannarith, sublinha kresimentu parseria entre nasaun rua nee.
Prezidente Ramos Horta hatete, Timor Leste no Kambodia iha paralelu istoriku nasaun rua nee sofre tinan barak husi violensia no difikuldade sira, no nasaun rua nee ultrapasa ona adversidade boot hodi harii sosiedade pasífiku no demokratiku.
“Istoria komun ida nee kria fundasaun uniku ba komprensaun no solidariedade entre ita nia povu sira. Hau fiar katak nomeasaun Embaixador da Costa nian sei eleva no no hametin liutan relasaun amizade no kooperasaun entre ita nia nasaun rua.” Dehan PR Horta.
Prezidente dehan, nomeasaun Embaixador Marcos dos Reis da Costa reprezenta progresu signifikativu ida iha relasaun diplomatika entre nasaun rua nee no reflete sira nia kompromisu hamutuk ba kooperasaun rejional no dezenvolvimentu iha kuadru ASEAN nian.
Nunee mos Ministru Negosiu Estrajeiru no Koperasaun (MNEK), Bendito Freitas ba jornalista hatete, ohin dia 9 Junhu 2025 Prezidensia Republika fo tomada de pose ba Embaixador Marcos atu ba Kambodia.
“Embaixador Marcos atu ba troka ita nia embaixador Hermegildo iha neeba, hahu nia funsaun prevemente, ita boot sira hatene katak tuir konstituisaun atribui kompetensia hotu ba Prezidente Republika ba asuntu relasaun internasionais atu nomeia nomos atu ezonera embaixador sira nomos enviandu espesial bainhira fo komfiansa ba,” katak Ministru.
Ministru dehan, ohin iha nee iha Prezidensial Republika liu husi dekretu numeru 56/2025 fo ona nomeasaun ba Embaixador foun Marcos diplomata neebe por kareira mais esperiensia mais 20 anos neebe iha konfiansa para halo knaar iha kambodia.
Nunee mos Embaixador Timor Leste ba Reinu Kambodia, Marcos dos Reis da Costa liu husi juramentu hatete, nia sei halao knaar tuir konstituisaun lei neebe mak vigora.
(eme)
