DILI, STLTIMORLESTE.com – Prezidente Republika (PR) Jose Ramos Horta hateten, Governu seidauk iha politika neebe diak atu proteje no fo asistensia neebe diak ba labarik no inan isin rua sira.
Kestaun nee Xefe Estadu aprezenta relasiona ho selebrasaun loron mundial ba labarik sira iha 1 Junhu 2025 nee.
“Asistensia medika preventiva ba inan sira, programa sira nee kuaze ke la iha liu, evita violensia kontra kosok oan labarik sira iha uma no eskola,” hateten PR, Jose Ramos Horta ba jornalista sira liu husi konferensia imprensa iha salaun VIP, Aeroportu Internasional Prezidente Nicolao Lobato, Komoro, Domingu (01/06/2025).
PR Horta hatutan, nia foin lalais kolia ona ba governante hotu-hotu katak kuandu temi loron mundial ba labarik sira ou ba kualker ema nee hanesan simboliku deit.
Maibe tuir PR Horta katak, Governu presiza iha komitmentu atu fo asistensia neebe diak ba labarik no inan isin rua sira, laos kada tinan atu selebra mak kolia kona-ba ida nee.
“Komitmentu no kumpromisu atu investe boot liu ba labarik sira no inan isin rua tanba ita hakarak kosok oan sira ho saude diak mak tenke hahu ho nutrisaun husi inan sira. Nee kumpromisu nee papel Governu tenke halo duni ba futuru nasaun ida nee nian,” tenik nia.
(alb)
