DILI, STLTIMORLESTE.com – Prezidente Republika (PR), José Ramos Horta hasoru malu ho Dr. Unni Karunakara no reprezentante sira husi Institutu Internasional Saude Global Universidade Nasoens Unidas (UNU-IIGH). Delegasaun nee hakarak estabelese kolaborasaun akademika foka ba impaktu Mudansa Klimatika.
Prezidente Republika José Ramos Horta simu vizita husi Dr. Unni Karunakara no reprezentante sira husi Institutu Internasional Saude Global Universidade Nasoens Unidas (UNU-IIGH) iha Palasiu Prezidensial Nicolao Lobato, Bairo Pite, Segunda lokraik (27/01/2025).
Iha delegasaun sira nia vizita dahuluk mai Timor Leste, hakarak estabelese kolaborasaun akademika sira neebe foka ba impaktu sira mudansa klimatika nian ba saude publika iha nasaun nee.
Iha enkontru nee, Dr. Karunakara destaka UNU-IIGH nia pozisaun uniku nuudar ajensia ONU uniku neebe iha sede iha Ázia, ho sede iha Kuala Lumpur. Institutu nee buka atu haburas parseria peskiza nian ho Universidade Nasional Timor-Leste (UNTL) no iha planu atu fasilita troka peskizador sira entre Dili no Kuala Lumpur.
Iha biban nee, Prezidente Ramos Horta espresa apoiu makaas ba inisiativa nee, haree hanesan oportunidade ida atu hasae envolvimentu entre peskizador Timoroan sira no komunidade akademika internasional.
Delegasaun UNU-IIGH neebe inklui peritu klima no saude Dr. Remco sei pasa loron balu hasoru malu ho parte interesada oin-oin inklui Reitór UNTL, Sr. Martin, organizasaun sosiedade sivíl no reprezentante ajensia ONU sira.
Kolaborasaun nee ho objetivu atu rezolve dezafiu sira neebe interligadu kona-ba krize klimatika, problema saude, pandemia no inseguransa ai-haan, enkuantu aproveita Timor Leste nia pozisaun uniku nuudar nasaun Pasífiku no posibilidade membru ASEAN ho ligasaun ho nasaun sira neebe koalia lian português (CPLP).
(eme)