DILI, STLTIMORLESTE.com – Prezidente Republika (PR), Jose Ramos Horta hatoo kondolensia ba felesimentu eis Prezidente Republika Edgar Chagwa Lungu.
Prezidente no Laureadu Nobel ba Pas, Jose Ramos Horta espresa ninia kondolensia profunda ba Governu no Povu Zambia ba falesimentu Eis Prezidente Edgar Chagwa Lungu, iha loron 5 fulan Junu tinan 2025, iha Pretoria, Afrika-Sul.
Iha karta kondolensia formal ida neebe diriji ba Prezidente Republika Zambia nian, Hakainde Hichilema, iha loron 06 fulan Junu tinan 2025, Prezidente Ramos Horta rekonese kontribuisaun signifikativu sira husi matebian eis-Prezidente ba dezenvolvimentu politiku no instituisional Zambia nian durante nia mandatu nuudar Xefe Estadu.
Prezidente Ramos Horta rekonese eis Prezidente Lungu nia dedikasaun ba servisu publiku no nia kompromisu ba prinsipiu sira husi estadu direitu no unidade nasional, neebe mak inkorpora iha Zambia nia lema nasional “Zambia Ida, Nasaun Ida.”
Prezidente observa katak Lungu servisu ho determinasaun no lideransa durante periodu difisil ida iha Zambia nia istoria.
“Eis Prezidente Lungu halao papel importante ida iha vida politika no institusional Zambia nian, servisu ho dedikasaun, determinasaun no espiritu lideransa nian durante periodu difisil ida iha istoria nasaun nian. Ninia dalan guia husi sentidu dever no kompromisu forte ida ba servisu publiku, estado direitu, no unidade nasional prinsipiu sira neebe inkorpora iha Zambia Ida, Nasaun Ida. Iha momentu tristeza no no lutu ida nee, ami espresa ami nia solidariedade ho Nasaun Zambia neebe triste lakon sira nia eis-Xefe Estadu ida. Ami hamutuk ho imi hodi hanoin hikas, ho esperansa katak ninia legadu bele inspira jerasaun futuru sira atu servisu ho kompromisu foun ba pas, demokrasia, no dezenvolvimentu,” dehan Prezidente Ramos Horta husi Komunikadu neebe STL asesu tersa (10/06/2025).
Prezidente Ramos Horta nia mensajen refleta ligasaun forte amizade no solidariedade entre Timor-Leste no Zambia, nasaun rua neebe hasoru ona dezafiu signifikativu sira iha sira-nia dalan ba demokrasia no dezenvolvimentu.
(eme)
