DILI, STLTIMORLESTE.com – Prezidente Republika (PR), Jose Ramos Horta hatoo parabens ba Luis Montenegro simu pose ba Primeiru Ministru no ba formasaun Governu Konstitusional ba dala-25 Republika Portugal nian.
Iha karta ofisial ida neebe diriji ba Primeiru Ministru Portugal nian, Luís Montenegro, iha loron 6 fulan Junu tinan 2025, Prezidente Ramos Horta elojia vitalidade demokratika neebe hatudu husi povu portuges iha eleisaun lejislativa sira loron 18 fulan Maiu tinan 2025 nian, no serimonia tomada-de-pose tuirmai neebe prezide husi Prezidente Reusade Reusa Republika Portugeza, iha Palasiu Nasional da Ajuda.
“Portugal sai ona ba Timor Leste, referensia ida ba estabilidade demokratika, modernidade europeia no solidariedade fraterna”, afirma Prezidente Ramos Horta iha nia mensajen ba Primeiru-Ministru Montenegro husi Komunikadu neebe STL asesu Tersa (10/06/2025).
Prezidente sublina relasaun istorika no afetiva neebe klean entre nasaun rua nee, neebe harii iha lian, kultura, valor komun no kooperasaun neebe konsistente iha dekada barak nia laran.
Prezidente reafirma kompromisu Timor Leste nian atu hametin kooperasaun bilateral no multilateral ho Portugal iha lideransa governu foun nian.
Prezidente Ramos Horta destaka mos dedikasaun Timor Leste nian hodi aprofunda koordenasaun iha Komunidade País sira Lian Portuges (CPLP) nia laran no hodi promove integrasaun tomak nasaun nian iha Asosiasaun Nasaun sira Sudeste Aziatiku nian (ASEAN), hodi promove valor internasional sira neebe fahe iha kontestu rua nee.
Prezidente hakotu ninia mensajen hodi hatoo votu diak ba susesu tomak Primeiru-Ministru Montenegro nian iha ninia kargu aas no ba XXV Governu Konstitusional hodi kumpre mandatu neebe povu português fo fiar ba nia.
Mensajen felisitasaun nee reforsa lasu diplomatiku neebe metin entre Timor Leste no Portugal, hodi reflete parseria kleur entre nasaun rua nee iha promosaun valor demokratiku no kooperasaun internasional.
(eme)
