DILI, STLTIMORLESTE.com – Prezidente Republika (PR), José Ramos Horta hatoo votus parabens ba komunidade Musulmanu iha Timor Leste.
“Maun-alin no inan-feton Musulmanu sira iha Timor Leste, hodi povu Timor Leste nia naran hau hatoo hau nia votus kmanek liu ba imi hotu iha okaziaun Ksolok Eid al-Adha 2025. Eid al-Adha fo hanoin mai ita kona-ba istoria profunda husi Profeta Ibrahim nia fiar neebe metin no vontade atu sakrifika saida mak folin liu ba nia iha devosaun ba Maromak,” dehan PR Horta liu husi mensajen ba loron Idul Adha, Sesta (06/06/2025).
PR Horta dehan, narativa intemporal ida nee koalia kona-ba esensia husi esperiensia umana neebe hanesan.
“Apelu atu fó ita nia konfiansa iha sabedoria divina atu atua ho laran-luak, no atu hatudu ita nia kompromisu ba buat neebe diak liu iha ita nia komunidade. Progresu lo-loos presiza sakrifísiu, pasiénsia no kompromisu ne’ebé metin ba ita nia valór sira ne’ebé partilha hanesan kompaixaun, justisa no respeitu ba malu,” katak Horta.
Xefe Estadu hatete, espíritu fraternidade umana neebe Eid al-Adha selebra partikularmente signifikativu iha rai doben Timor Leste. Nasaun ho orgulhu simu prinsípiu fraternidade umana nian hanesan trasa iha dokumentu kona-ba Fraternidade Umana ba Pas Mundial no Moris Hamutuk.
“Ami fiar katak pas loos so bele alkansa bainhira ita rekonhese ita nia interligasaun fundamental nu’udar ema, la haree ba ita nia diferensa relijiozu ka kultural sira. Bainhira ita kontinua atu pozisiona Timor Leste iha palku mundiál no hametin ita nia parseria internasionál sira, ita halo ida ne’e ho komprensaun katak ita nia diversidade mak ita nia forsa, no ita nia unidade mak ita nia fundasaun. Armonia inter-relijioza ne’ebé ita kultiva sai ezemplu ba nasaun sira seluk oinsá kona-ba komunidade oin-oin bele moris hamutuk iha pás no respeitu ba malu,” dehan Horta.
Hein katak Eid al-Adha ida nee lori ksolok, pas no prosperidade familia no komunidade sira. Hein katak ida nee bele hametin liu tan ligasaun sira neebe halibur hamutuk nuudar povu ida deit, no bele inspira hotu hodi kontinua servisu hamutuk ba Timor Leste ida neebe justu, kompaixaun no prosperu liu.
“Eid Mubarak ba ita nia Maun-alin no Inan-feton Musulmanu sira hotu Ho solidariedade no amizade,” mensajen PR Horta.
(eme)
