PR Horta Ho Embaixadora Xina Inaugura Mini Jardin Iha Palasiu Prezidensial

PR Horta Ho Embaixadora Xina Inaugura Mini Jardin Iha Palasiu Prezidensial. (Foto: Media PR)

DILI, STLTIMORLESTE.com – Prezidente Republika (PR) Jose Ramos Horta hamutuk ho Embaixadora Xina iha Timor Leste (TL) inaugura Mini Jardin iha Palasiu Prezidensial.

Iha loron Segunda nee (27/01/2025), Prezidente Republika Jose Ramos Horta hamutuk ho Embaixadora Xina mai TL, Wang Wenli halo inaugurasaun ba Mini Jardin iha Palasiu Prezidensial Nicolao Lobato, Bairru Pite.

Iha biban nee, Prezidente Republika Jose Ramos Horta hatete, antes nee Prezidente Republika husu ba Embaixada atu halo salaun Xina no resposta husi Prezidente Xina hatete, bele entaun hahu halo kiik ida bolu jardin interior, jardin uma laran ou salaun Xina.

“Jardin Xina nee tipiku konhesidu iha mundu no bonitu tebes, maibe hau mos husu halo jardim au, tanba hau desde uluk kedas kiik sempre moris iha au laran iha Laklubar, Natarbora no Soibada. Au nee importante ba ekonomia, se mak iha plantasaun au hetan osan fasil, tanba mundu hotu-hotu hakarak sosa au. Entaun dezde tinan 10 liu dehan ba Governu tau osan kuda au, ita boot sira ba karik Metiaut, iha hau nia uma oin rai ida mamuk iha neeba nakonu ho au, entaun hau husu mos atu halo jardim boot liu oituan iha Palasiu Lahane, tanba foho sorin sorin foho lolon ladun diak, entau halo jardin ida boot ho au deit para iha dalan, banku no kaza de banho para populasaun bele pasiar ho familia tuur iha neeba, bele haree ema ida rua loke kafe oan ida serve deit xa buat sira nee, maibe tanba orsamentu boot liu embaixadora hatete hein lai husi Xina,” dehan Prezidente Republika.

Horta dehan, projetu nee kapaas los, tanba nee hakarak halo ida iha Galery Farol maibe sei halo iha oin, maibe sei koordena didiak ho Prezidente Munisipiu Dili. Se sira konkorda entaun PR mak simu responsabilidade buka finansiamentu halo jardin Xina ida iha Farol boot no naruk oituan para halo sidade furak liu tan.

Xefe Estadu hatete, fatin neeba diak ona, uluk hanesan abandonadu, maibe presiza ema ho kultura ho esperiensia para halo jardin ida ke diak liu tanba familia bele haree, maibe ida nee PR sei buka orsamentu ketak, laos orsamentu Governu mais husi kolega balu iha rai liur.

(eme)

Share it :

Leave a Reply

Your email address will not be published. Required fields are marked *