DILI, STLTIMORLESTE.com – Prezidente Republika (PR), Jose Ramos Horta kondekora Reprezentante Santa Se iha Timor Leste (TL), Monsenhor Marco Sprizzi ho grau kolar Ordem TL.
Prezidente Republika, Jose Ramos Horta kondekora Reverendísima Monsenhor Marco Sprizzi, Enkarregadu Negosius husi Nunsiatura Santa Se iha Timor Leste, ho Grau Kolar Orden Timor Leste, iha serimonia solene ida iha Palasiu Prezidensial Nicolau Lobato, Sesta Lokraik (28/02/2025).
Monsenhor Sprizzi nia karreira diplomatika neebe distintu abranje liu dekada rua hodi serbí Santa Se iha Brazil, Estadus Unidus, Índia, Nepal, Koreia, Mongolia, Malazia, no ikus liu nuudar Enkaregadu Negosius Rezidente iha Timor Leste dezde Janeiru 2019.
Durante nia mandatu tinan 6 iha Timor Leste, Monsenhor Sprizzi servisu ho dedikasaun no efikasia hodi implementa konkordata neebe asina entre Timor Leste ho Santa Se iha tinan 2015. Ninia realizasaun prinsipal sira inklui asegura vistu ba tempu naruk ba misionariu sira kulmina iha aprovasaun ba lei espesífiku ida neebe fo lisensa rezidensia tinan 5 ba pesoal relijiozu sira estabelese transparensia no prestasaun ba kontas iha kontribuisaun anual estadu nian ba Igreja ho relatoriu finanseiru komprensivu asegura rekonesimentu legal ba personalidade jurídika husi dioseze, parokia, no kongregasaun relijioza sira iha Timor Leste, Implementa sistema rejistu ba kazamentu katoliku ho autoridade sivíl sira fo apoiu ba estabelesimentu Universidade Katolika Timor Leste nian kria tribunal ekleziastiku sira hanesan trasa iha Konkordata determina nomeasaun ba Bispu foun Baukau nian Distribui maizumenus US$ 12 milhaun ba projetu sira neebe fo benefísiu ba povu Timor Leste.
Monsenhor mos lidera aprovasaun matadalan sira ba protesaun menor sira husi abuzu iha igreja lidera konstrusaun edifísiu Nunsiatura Apostolika foun neebe furak iha Dili Koordena vizita apostolika istorika dahuluk Amu Papa Francisco mai Timor Leste iha Setembru tinN 2024 neebe lori Timor Leste ba atensaun global.
Ordem Timor Leste, onra aas liu nasaun nian, fo ba Monsenhor Sprizzi nuudar rekonhesimentu ba ninia kontribuisaun exepsional hodi hametin relasaun diplomatika entre Timor Leste no Santa Se, no ninia esforsu umanitariu signifikativu neebe fo benefisia sidadaun timoroan barak.
Prezidente Republika Jose Ramos Horta hatete, durante Monsenhor nia mandatu iha Timor Leste laos reprezenta diplomata ida, maibe hanesan amigu Timor Leste.
“Monsenhor Sprizzi laos deit reprezentante diplomatiku ida, maibe verdadeiru amigu ba Timor Leste no nia povu, ninia esforsu neebe la kole hodi hametin relasaun bilateral entre Timor Leste ho Santa Se, partikularmente ninia servisu iha implementasaun konkordata, ba servisu sira neebe nia presta benefisia sidadaun Timoroan sira durante tinan hirak nee sai folin boot tebes ba ita nia nasaun,” dehan PR Horta.
PR Horta dehan, foin lalais nee liu husi lideransa Monsenhor Sprizzi nian, Timor Leste halo ona istoria iha mapa global ho vizita apostolika istorika dahuluk Papa Francisco nian mai Timor Leste, Monsenhor Sprizzi nia legadu servisu, transparensia, no dedikasaun sei hela ba tempu naruk depois ninia partida.
“Nuudar rekonhesimentu ba ninia misaun neebe inkansavel mak Estadu rekonhese ninia kontribuisaun estraordinariu ho ita nia onra aas liu,” katak PR Horta.
Nia hatutan, relasaun entre Timor Leste no Santa Se sai forte tebes dezde molok independensia, hahu ho vizita istoriku Papa João Paulo II nian iha tinan 1989. Hafoin independensia, Santa Se estabelese relasaun diplomatika ho Timor Leste, neebe kulmina ho asinatura Konkordata iha 2015.
Tratadu internasional komprensivu ida nee regula kooperasaun iha setor barak, inklui edukasaun, servisu sosial, vistu misionariu, servisu kapelaun ba ospital no prizaun sira, universidade, edukasaun relijioza iha eskola sira, patrimoniu kultural, izensaun fiskal, no asuntu alfandega. Iha loron 28 fulan Fevereiru tinan 2025, Konferensia Episkopal no Gabinete Primeiru Ministru asina akordu anual kona-ba kontribuisaun estadu nian ba Konferensia Episkopal ba edukasaun, servisu sosial sivíl, no governasaun interna igreja nian.
“Bainhira refleta kona-ba ninia tempu iha Timor Leste, Monsenhor Sprizzi espresa gratidaun profunda Hafoin tinan neen, hau sei husik Timor Leste ho sentimentu riku tebes. Hau simu buat barak liu buat neebe hau bele fo, liu-liu kona-ba umanidade no relasaun pesoal sira. Timoroan sira nia laran diak, hamnasa, no ezemplu notavel kona-ba rekonsiliasaun, identidade, no dignidade povu timoroan nian kona tebes hau laran profundamente. Hau sei lori sentidu reprezentasaun povu no nasaun ida neebe hau hadomi. Unidade povu timoroan nian mak buat uniku ida neebe hau sei sempre partilha ho ema seluk neebe hau hasoru, ho orgulhu hahii Timor Leste.” Katak PR Horta.
Monsenhor Sprizzi sei husik Timor Leste iha loron 8 Marsu tinan 2025, hodi asumi kargu foun nuudar Prezidente Gabinete Trabalhu Santa Se nian.
(eme)
