DÍLI, STLTIMORLESTE.com — Prezidente Repúblika (PR), José Ramos-Horta presta omenajen ba Sebastião Gomes durante serimónia transladasaun nia restu mortál iha Santa Cruz, Díli.
Serimónia ne’e hala’o iha kuarta-feira, 28 Outubru 2026, ho prezensa autoridade, família, kolega no komunidade sira atu fó omenajen ba mártir rezisténsia Timor-Leste nian.
Iha ninia diskursu, José Ramos-Horta afirma katak Sebastião Gomes no kolega sira-nia sakrifísiu iha luta rezisténsia kontribui ba mundu nia atensaun ba situasaun Timor-Leste.
“Presta omenajen dala ida tan ba Sebastião liuhusi nia, ho kolega sira hotu iha 12 Novembru, hodi mundu loke matan ba Timor-Leste,” dehan Prezidente Repúblika.
Nia subliña katak, sakrifísiu iha luta ba independénsia lori sofrimentu boot ba povu Timoroan, inklui família sira ne’ebé lakon sira-nia membru família.
Prezidente mós hato’o solidariedade ba família Sebastião Gomes, hodi enkoraja sira atu kontinua hametin korajen no la haluha sakrifísiu ne’ebé hala’o ba liberdade nasaun.
Nia lembra mós vítima sira ne’ebé lakon sira-nia vida iha 12 Novembru, Matebian, Kraras, Fronteira, Zona Leste no fatin seluk, inklui sira ne’ebé hetan tortura durante okupasaun.
Prezidente Komité 12 Novembru, Grigorio Saldanha, afirma katak trasladasaun ne’e marka pájina foun iha memória istórika juventude estudantil rezisténsia nian.
“Ohin ita kompleta tinan 35; ita marsa husi Igreja Motael mai fali atu rekorda momentu difisil iha tinan 35 ba kotuk,” dehan Grigorio Saldanha.
Nia esplika katak, mudansa ba fatin hakoi foun sei fó oportunidade ba sidadaun sira atu vizita no fó omenajen ba Sebastião Gomes ho dignidade.
Grigorio mós refere katak, Komité 12 Novembru no Governu preokupa kona-ba asesu ba fatin hakoi uluk, ne’ebé difikulta ema atu vizita.
Reprezentante família, Moisés Rangel, hato’o agradese ba Maromak no ba ema hotu ne’ebé marka prezensa no fó apoiu iha loron importante ne’e.
Moisés afirma katak, família hato’o agradese ba Governu Timor-Leste, ministériu relevante, autoridade nasionál no munisipál, instituisaun no organizasaun sira ne’ebé kontribui ba prosesu trasladasaun.
Nia mós agradese ba família, kolega, belun no komunidade sira ne’ebé akompaña família husi 27 Maiu to’o 28 Outubru 2026.
“Ita-nia solidariedade, domin no apoiu moral fó forsa ba família atu enfrenta momentu emosional ne’e ho pasiénsia, hakmatek no dignidade,” dehan Moisés Rangel.
Trasladasaun ne’e sai momentu atu família, autoridade no komunidade hamutuk hodi fó omenajen ba Sebastião Gomes, no reafirma memória sakrifísiu sira ne’ebé kontribui ba independénsia Timor-Leste.
Serimónia ne’e mós hato’o mensajen ba jerasaun foun atu la haluha istória rezisténsia, no kontinua promove unidade, dame no respeitu ba mártir sira.
(eme)
