DILI, STLTIMORLESTE.com – Prezidente Repúblika (PR) José Ramos-Horta salienta vizaun ekonómika Timor-Leste nian, reziliénsia demokrátika no kompromisu nasaun nian ba konstrusaun dame, durante diálogu espesiál iha Horasis Visionary Circle 2026, iha Singapura.
Tuir komunikadu ne’ebe STL asesu Segunda (07/09/2026) hatete, sesaun ne’ebé prezididu husi Membru UK House of Lords, Baron Woolley of Woodford, fó oportunidade ba lider sira atu diskute lideransa iha tempu inserteza globál, reziliénsia demokrátika no transisaun estratéjika Timor-Leste ba prosperidade sustentável iha tempu naruk.
Iha diálogu ne’e, Prezidente Ramos-Horta hafolin progresu Timor-Leste dezde restorasaun independénsia, liuliu iha jestaun ekonómika prudente, ne’ebé inklui dívida nasionál ne’ebé ki’ik, diversifikasaun Fundu Rikeza Soberanu no investimentu boot iha setór edukasaun no saúde.
Xefe Estadu mós esplika papél Timor-Leste nu’udar ponte estável no demokrátiku entre rejiaun Sudeste Aziátiku no Pasífiku.
Prezidente afirma katak polítika relasaun esterna Timor-Leste kontinua bazeia ba prinsipiu atu sai “belun ba ema hotu-hotu, la’ós inimigu ba ema ida.”
Akompaña husi Vise-Primeiru-Ministru, Francisco Kalbuadi Lay, Prezidente Ramos-Horta mós hato’o preokupasaun kona-ba dezafiu globál sira, inklui impaktu mudansa klimátika, nesesidade atu prevene konflitu ho antesipasaun no transisaun ba enerjia matak.
Iha okaziaun ne’e, Prezidente konvida líder negósiu no investidor globál sira atu sai parseiru ho Timor-Leste iha prosesu dezenvolvimentu nasaun nian, ho objetivu atu harii ekonomia ne’ebé diversifikadu, reziliente no sustentável.
Horasis Visionary Circle 2026 reúne líder polítiku, negósiu no pensadór internasionál sira hodi diskute dezafiu globál no oportunidade foun ba dezenvolvimentu no kooperasaun internasionál.
(eme)
