DILI, STLTIMORLESTE.com – Prezidente Republika (PR), Jose Ramos sempre apoiu estudante neebe halao estudu iha area siensia no teknolojia.
Prezidente Republika, Jose Ramos Horta hatoo kestaun nee bainhira vizita Kolejiu São Miguel Arcanjo iha Komoro, Dili, hodi entrega komputador no printer ba instituisaun nee.
Doasaun neebe sai posivel ho apoiu husi belun no parseiru internasional sira, hakarak hametin rekursu pedagojiku sira, liu-liu ba estudante sira neebe estuda iha area siensia no teknolojia nian.
Durante ninia diskursu, Prezidente Ramos Horta reafirma ninia kompromisu pesoal hodi promove edukasaun, hodi destaka katak dala barak nia buka atu ultrapasa obstakulu burokratiku sira hodi garante katak apoiu too ba estudante sira no eskola sira neebe presiza liu ho lalais no efetivu.
Xefe Estadu aborda mos inisiativa luan liu iha ambitu dezenvolvimentu nasional nian, inklui projetu infraestrutura sira hanesan hadia estrada rural sira no fornese rekursu ba negosiu kiik sira, sublina katak investimentu sira hanesan nee esensial ba progresu sustentavel nasaun nian.
“Hau nia kolega diak balun iha Honkong, Japaun sira iha meius, riku, hau sempre husu ba sira haruka sasan ruma mai hanesan ropa sapatu foin daudaun hau hakarak leptop, printer atu fo ba estudante balun iha instituisaun balun, tanba nee hau agradese ba sira,” dehan PR Horta liu husi diskursu iha Saon Miguel Komoro, Kinta (05/06/2025).
Prezidente dehan, Prezidensia mos liu husi nia orsamentu rasik halo uma ba kiak sira iha foho neeba balun loke kios ba sira ba inan sira kiak para sira iha meius ruma, se fo deit hahan too deit fulan rua tolu laiha ona entaun buka meius loke kios, apoiu nee ba iha Dili balun iha foho, maibe Governu mak iha kompetensia apoiu boot ba povu no eduksaun halo dezenvolvimentu oinsa hadia estrada rural.
Prezidente Repblika hatete, sasan neebe hetan apoiu husi belun sira fahe ona ba estudante sira iha UNDIL, UNITAL no seluk tan.
“Balun fahe ba estudante iha UNITAL, UNDIL, UNTL, maibe fo individual, baibain hau fo leptop nee ba sira iha universidade sira neebe estuda iha area siensia no teknolojia, baibain hau fo ba feto la ba mane sira, ita tenke buka tulun feto sira iha igualdade jeneru, sim balun fo ba mane balun neebe susar no araska duni maibe so ba sira neebe estuda iha area teknolojia, o estuda relasaun internasional, sospol, buat sira nee nee los hanesan prioridade ida,” dehan PR Horta.
Prezidente aproveita oportunidade hodi agradese ba kontribuisaun jeneroza husi belun no parseiru sira husi Rejiaun Administrativa Espesial Hong Kong, Japaun, Xina, Malazia no Koreia-Sul, neebe fo ona sasan oin-oin husi roupa, sapatu no komputador too ai-moruk esensial no suplementu vitamina sira. Ramos Horta destaka katak espíritu solidariedade internasional ida-nee sai nuudar komplementu vital ida ba esforsu governu nian hodi fo apoiu ba populasaun sira neebe vulneravel liu.
(eme)
