AMBENO, STLTIMORLESTE.com – Prezidente Republika (PR), Jose Ramos Horta triste ho lista editais veternus iha Timor Leste (TL) barak loos no lista sei aumenta liu tan.
Deklarasaun nee Xefe Estadu hatoo iha ambitu vizita Oekusi no oferese ai-haan ba maluk vulneravel ho defisiente sira iha Oekusi, Segunda (03/03/2025), liga ho loron nasional Veteranus neebe monu iha loron 3 Marsu 2025, Ministru Asuntu Kombantente Libertasaun Nasional (MACLN) kansela atividades komemorativu loron nasional veteranus, tanba preokupa ho lista editais nee.
“Hau rasik hakfodak ho lista editais sira nee, tanba balu halo rejistu halo sala, por ezemplu rejistu ba apoiantes barak husi Australia mos falhansu barak, balu foin daudaun nee hau simu karta husi Darwin, Australia, sira ba halo identifikasaun no rejistu iha Darwin nee la hatene ga? Sei la hatene karik ba konfirma ho ema sira iha neeba, pior liu tan mak lista editais iha rai laran, hau haree iha televizaun Jeneral Koliati hirus oituan, nee nia iha razaun, tanba saida mak sira haluha fali ida nee, Koliati sira la hatene ga ninia luta nee, maibe ita kompriende tanba hau la fiar sira halo tanba razaun politika maibe tanba deit dez-organiza oituan, laos intensaun foer, ida nee lae, maibe ida nee tanba falhansu, tanba nee iha tempu badak koriji kedan,” dehan nia.
Iha biban nee, PR Horta hatoo ninia mensajen hodi hakruk ba veteranus sira.
“Hau hakruk ba veteranus sira, hahu husi Maun Boot Xanana Gusmão, nia mak veteranus numeru um, nia mak dada ita too ohin loron ita iha nee, Maun Boot Xanana la kaer karik Frente Armada, Frente Politika, momentu neeba iha 1981 ba oin, ita mate hotu, maibe laos Xanana rasik nia luta mesak deit, hanesan nia sempre koalia katak luta nee povu mak luta, laos nia, sempre hateten katak laos hau, maibe povu presiza lider ida tanba povu luta sem lider,” dehan PR Horta.
Nia haktuir tan katak, dezde tempu Nai Kristu too Amu Papa, rai hotu-hotu, sarani ka la sarani, politiku presiza lider ida, lider hanesan Prezidente RDTL dahuluk, Nicolau Lobato no lider ida hanesan Maun Xanana, idak-idak iha nia fatin, iha ninia istoria, nee duni hakruk ba maun Boot Xanana, Taur Matan Ruak, Lere Anan Timur, Falur Rate Laek, Sabika, Koliati no ba sira hotu, liu-liu joven klandestina 12 de Novembru, tanba husi masakre nee, joven sira nia partisipasaun importante tebes-tebes, tanba nee mak ita manan luta nee,” afirma PR Horta.
Nia haktuir tan katak, labele haluha veteranus sira neebe mak kaer kilat nee, kaer kilat nee labarak tanba mate hotu, sira eroi maibe lider klandestina barak iha Jakarta, Bali, Surabaya, hakruk ba sira.
“Hau hakruk ba sira, hau reja ba sira, tanba husi sira nia luta mak ohin TL hetan ona independensia total,” akresenta PR Horta.
(jos)
