DILI, STLTIMORLESTE.com – Prezidente Republika (PR), Jose Ramos Horta husu Primeiru Ministru (PM), Kay Rala Xanana Gusmão atu reativa fali atividade Grupu Arte Marsiais (GAM) no Arte Rituais (AR), nunee sira bele halao atividade hanesan desportu ida.
Prezidente Republika hatoo lia hirak nee ba jornalista sira iha Hotel Timor, Kinta nee (12/12/2024).
Xefe Estadu dehan, nia mos hatoo ona ba Primeiru Ministru, Kay Rala Xanana Gusmão katak, diak liu loke fali Arte Marsiais no Arte Rituais, nunee sira bele halao fali atividade hanesan desportu ida, ho pedidu nee Primeiru Ministru resposta ona ba Prezidente katak, semana oin Konselhu Ministru se foti desizaun.
Nia hatutan, ohin halo enkontru Primeiru Ministru dala ida tan hatete, 2025 servisu makaas para ezekuta orsamentu importante objetivu boot mak infraestrutura ba zona rurais estrada nasionais no seluk tan.
“Sei buka mos servisu makaas dada investimentu iha rai laran governu sei haree mekanizmu ruma neebe liu husi mekanizmu neebe ita iha ajuda setor privadu, hau mos husu maun boot favor haree kona-ba bandu arte marsiais, entau semana nee mai Konselhu Ministru sei haree para foti tiha bandu nee husik arte marsiais halo sira nia atividade,” katak PR, Horta.
Prezidente Republika hatete, problema boot ho Arte Marsiais sira mak ladun iha kontrola nee, maibe iha fulan hira nia laran publiku la rona violensia, tanba nee Prezidente Republika husu Governu atu reativa fali.
“Hau husu Primeiru Ministru favor foti tiha bandu nee, Primeiru Ministru kontente ho evolusaun situasaun 2025 Governu sei servisu makaas ezekuta orsamentu,” hatete Horta.
Xefe Estadu hatete, durante nee joven sira hatudu sira nia maturnidade neebe mak diak tebes kria pas no estbalidade iha rai laran, tanba nee mak husu kontinua mantein pas no establidade iha rai laran, nunee hatudu ba mundu katak Timor Leste moris iha pas laiha konflitu.
(eme)
