DILI, STLTIMORLESTE.com – Prezidente Republika (PR), Jose Ramos Horta kontinua apoiu ba sidadaun vulneravel sira, liu-liu sira neebe mak hela iha fatin izoladu sira.
Prezidente Republika, Jose Ramos Horta liu husi nia pajina ofisial Tersa nee (04/03/2025) hatete, durante nia mandatu buka apoiu povu vulneravel liu-liu povu sira neebe hela iha fatin izoladu seidauk hetan tulun ruma husi Governu.
Prezidente Republika hatete, durante nee fo hahan ba labarik sira besik rihun ida iha palasiu Prezidensial nomos Bidau, Hera, Komoro no Oekusi.
“Prezidente mos fo hahan hamutuk kosok oan/labarik besik 1.000 (rihun ida) iha Palasiu Prezidensial, Bidau, Hera, Komoro, Oekusi, Prezidente Republika buka target ema neebe vulneravel liu, hela iha fatin izoladu, seidauk simu tulun ruma, prezidente fahe laptop, material eskolar, ropa, sapatu, bola futebol,” dehan PR Horta.
Prezidente Republika hatete, Timoroan balu mak ajuda Empreza PAX, EAST TIMOR TRADING,” Ita nia apa/ama komunidade Xina-Timorense, Amigos husi Japaun Nippon Foundation, Amigos Korea, Amigos Hong. Balun ajuda ho bolsa estudu, balun fo laptop,” katak PR Horta.
Aleinde nee Prezidente Republika entrega apoiu ai-haan no roupa esensial ba família ho defisiensia hamutuk 200 iha aldeia ualu iha Oekusi. Pakote umanitariu, neeebe inklui sapatu no nesesidade sira seluk, sai posivel atu distribui liu husi kolaborasaun ho parseiru Japones sira no fahe iha sentru Misionariu Dominikanu sira Rozariu nian.
Durante eventu nee, Prezidente Ramos Horta esplika katak, inisiativa ida nee ho objetivu atu komplementa esforsu Governu nian iha apoiu ba sidadaun sira neeebe vulneravel liu.
Prezidente subliña, prezidensia nafatin iha kompromisu atu servisu hamutuk ho ajensia Governu nian sira hodi hatan ba nesesidade komunidade nian iha area remota sira.
(eme)
