DILI, STLTIMORLESTE.com – Prezidente Republika (PR), Jose Ramos Horta hatete, Xefia EDTL iha Timor Leste simu salariu boot, maibe la fo retornu ba estadu no ahi eletrisidade kontinua mate lakan iha Timor laran tomak.
Xefe Estadu hatoo kestaun nee ba jornalista sira bainhira remata entrega Premiu Direitus Umanus Sergio Vieira de Mello Edisaun 17 ba vensedor nain lima iha Palasiu Prezidensial, Nicolau Lobato, Tersa 910/12/2024).
Iha biban nee, Prezidente Republika mos husu ba Primeiru Ministru atu bele haree servisu EDTL nian, tanba ho salariu neebe boot maibe ahi eletrisidade kontinua mate lakan, tanba nee husu atu koa salariu.
“Hau hatete ona ba maun boot Primeiru Ministru, maun boot nee ema matenek, ema diak, nia konkorda, hau hatete instituisaun sira bolu instituisaun publiku barak los iha Timor, tanba sa mak halo instituisaun publiku nee laos tanba iha justifikasaun razaun para halo, porezemplu iha Australia, Portugal ka rai sira avansadu tebes, servisu eletrisidade bele privadu iha Nova Yorke Amerika, kompanhia boot tebes mak kaer eletrisidade no bee, iha Portugal servisu eletrisidade laos privadu hanesan institutu publiku maibe ho jestaun tuir regras privadu nia servisu hatama osan boot los ba estadu ho susesu, laos deit iha Portugal,” katak PR, Horta.
Prezidente Republika hatete, iha Portugal servisu eletrisidade laos privadu hanesan institutu publiku maibe ho jestaun tuir regras privadu nia servisu hatama osan boot los ba estadu ho susesu, laos deit iha Portugal, maibe halo investimentu iha Amerika 60% investimentu eletrisidade setor enerjia solar iha Amerika mai husi eletrisidade Portugal nee justifika selu osan boot ba sira nia ema nee ho CEO.
“Iha Timor Leste eletrisidade mate moris, eletrisidade karun ona, depois halo institutu publiku selu diretor nee hanesan Prezidente ou liu tan fali nee mai husi lobi politiku lobi partidu, lo-loos instituisaun sira publiku nee tenke reve kompletamente tanba barak demais abuzu de poder, hau mak Primeiru Ministru, primeiru koa sira nia vensimentu labele liu fali Prezidente ka Tribunal Rekursu ou Prezidente Parlamentu, tanba saida mak Prezidente ka Diretor EDTL manan liu fali deputadu ida,” dehan PR, Horta.
Xefe Estadu hatete, Diretor EDTL nia salariu liu fali Deputadu, maski servisu la hanesan Deputadu sira halo lei, maibe Prezidente eletrisidade simu salariu boot maibe ahi eletrisidade kontinua mate lakan.
“Ita gasta orsamentu boot los eletrisidade kuaze bilhaun US$ 1 liu tan, maibe jestaun hatete aat tebes, iha klasifikasaun 1-10 top hau fo 2 ka 3 ba jestaun eletrisidade, tanba buat barak kuandu eletrisidade tunsae ema makina aat inkluidu makina horpital nia,” katak PR, Horta.
Nia dehan, lo-loos lori sasan neebe mak aat nee ba iha EDTL, nunee Xefia EDTL bele simu responsabilidade, tanba impaktu husi ahi mate sei estraga sasan barak.
(eme)
