DILI, STLTIMORLESTE.com – Prezepiu neebe furak liu mak harii ai-riin haat neebe importante hanesan domin, damen, justisa no ksolok iha ema idak-idak nia fuan.
Amu Paroku Nossa Senhora do Rosario de Fatima Atauro, Padre Guido Pereira hatete, nuudar nasaun, Katolika, prezepiu hanesan aspeitu ida manifesta ema ninia fuan, ema nia fiar, katak liu husi sinal neebe haree ho matan, nee hatudu buat sira neebe la haree ho matan liu-liu manifesta fiar nee diak tebes.
Tanba nee liu husi formasoes retiru hanorin sira atu labele para deit iha atividade sira neebe iha liur deit, maibe liu-liu ba iha riku soin espiritual nian, tanba prezepiu hanesan dalan ida atu hafanu ema idak-idak, katak selebra duni festa Natal.
Maibe liu husi prezepiu ida nee hafanu sarani sira, atu buat neebe liur hafanu mos ema prepara buat neebe iha laran, nunee prezepiu neebe liur los duni atu fo intensoes mai ema, katak preparasaun ba Natal ho kondisoes superior hafanu mos sarani atu prepara kondisoes interior nian mak arrependimentu ninia.
“Prezepiu neebe furak liu ita idak-idak nian mak hanesan harii airin haat neebe importante mak domin, damen, justisa no ksolok ninia iha idak-idak nia fuan, tanba buka nafatin respeitu prezepiu sira nee, hanesan damen instrumentu ida neebe mak hodi reflete kona-ba oinsa mak ita Nai Maksoin Maromak ida neebe hun no rohan laek hatudu nia domin mai Ita liu husi nia moris simples haraik aan kiak iha bibi luan simples ida hodi hatudu, oinsa ita bele haraik aan ba malu liu-liu Maromak neebe hatudu nia ezemplu haraik aan ninian atu ita bele banati tuir,” hatete Padre Guido ba STL liu husi telefone, Kinta (12/12/2024).
Tanba nee Amu dehan, sarani sira buka nafatin respeitu prezepiu sira neebe halo, tanba asuntu neebe ligasaun ho Maromak labele halo festa ruma hodi hases tiha ema nia sentidu atividade espiritualidade nian no hases ema husi orientasaun, neebe hafanu sarani sira atu hanoin kona-ba Misteriu neebe Nai Maromak mai moris iha mundu liu husi Kosok Oan Jesus iha prezepiu Belem nian.
No husu ba sarani joven sira, atu resepeita nafatin prezepiu neebe halao liga ema hodi hatudu identidade fiar kultural nian katak, ida nee mak identidade Timor nian, prezepiu halo atu manifesta fiar nuudar identidade fiar kultural Timor nian nomos hatudu respeitu onra ba elementu sagradu sira, lori ema besik liu tan ba Maromak liu husi aspetu asperior husi prezepiu sira halo nee.
(joa)
