BAUCAU, STLTIMORLESTE.com – Produsaun hare kulit iha Munisípiu Baucau iha tinan 2026 hetan tonelada rihun 36 kompara ho tinan kotuk ne’ebé rejista tonelada rihun 29, no produsaun batar tinan 2026 hetan tonelada rihun 10 resin.
Diretór Servisu Munisipál Agrikultura Baucau, Agostinho Ximenes esplika katak, iha tinan 2026, área kultivasaun ba hare kulit iha Baucau atinji hektare 9.051, kompara ho tinan kotuk ne’ebé área kultivasaun hamutuk hektare 8.600.
“Tinan ida ne’e kultivasaun no produsaun hare kulit mós sa’e. Produsaun atinji tonelada rihun 36 husi área kultivasaun hektare 9.051,” Agostinho Ximenes informa ba STL iha Vila Nova Baucau, Sábadu (17/10/2026).
Nia kompara katak, iha tinan kotuk, produsaun hare kulit iha Baucau rejista de’it tonelada rihun 29, ho área kultivasaun hektare 8.600.
Maibé produsaun tinan ne’e aumenta, tanba liga ho rekuperasaun sistema irigasaun Galata, iha Postu Administrativu Venilale, ne’ebé durante tinan barak la funsiona, ne’ebé mak funsiona fali iha tinan 2026 no permite agrikultór sira kultiva natar.
Aleinde mós aumenta natar sira iha Seiçal Baucau Vila pertense ba irigasaun Ossosege no Casameta mós kontribui ba aumentu produsaun. inkliu natar sira iha Suku Samalari área Fistau nian, ne’ebé antes abandona, hahú reativa fali iha tinan 2026.
“Husi produsaun hare kulit tonelada rihun 36 ne’e, área produsaun barak liu iha Baucau Vila, Venilale, liuliu área irigasaun Galata, Vemasse no Baguia Larisula,” nia esplika.
Maski produsaun aumenta, Agostinho Ximenes hateten katak, hare kulit ne’ebé kolleta hela iha armazenamentu komunidade nian. Parte husi produsaun ne’e komunidade uza ba konsumu no fa’an.
Iha parte seluk, nia mós relata katak produsaun batar iha Munisípiu Baucau durante tinan 2026 atinji tonelada rihun 10 resin, husi área kultivasaun ne’ebé luan liu hektare rihun lima.
Nia argumentu, aumentu produsaun hare kulit no batar iha rezultadu pozitivu ba atividade agríkola iha Baucau. Maibé, manutensaun sistema irigasaun, rekuperasaun natar abandona no monitorizasaun dadus produsaun kontinua sai aspetu importante atu ita asegura sustentabilidade produsaun agríkola iha futuru.
Entertantu dadus kona-ba produsaun ne’e, Servisu Munisípal Agrikultura Baucau hetan liuhusi extensionista agríkola sira iha tareñu.
(tom)
