DILI, STLTIMORLESTE.com – Profesores neebe koloka ba iha Munisipiu Ainaro, balu hela iha kos no balu hela iha komunidade nia uma, tanba Ministeriu Edukasaun (ME) seidauk halo rezidensia ba sira.
Dehan Diretor Edukasaun Munisipiu Ainaro, Patricio da Costa Magno ba STL liu husi telefone, Tersa nee (28/01/2025).
“Ita nia profesores sira nee hela iha komunidade sira nian uma, balu mak hela iha kos, sira nain 3 ka 4 hamutuk aluga ema nia uma, tanba ita nia Governu seidauk prepara fatin alojamentu ba sira, nee duni hakarak ka lakohi ida nee mak realidade, kona-ba problema bee moos nian, nee sira uza komunidade sira nia bee, nee duni balu ita nian komunidade mak ofrese fatin ba sira, kuandu laiha liu ona nee mak balu tenke aluga deit ema nia uma,” dehan nia.
Patricio hatutan, profesores neebe mak ME koloka mai iha Munisipiu Ainaro nee iha primeiru kolokasaun nee hamutuk 42, koloka faze segundu hamutuk 43, hamutuk 85 profesores neebe koloka mai iha Ainaro.
Iha fatin seluk, Diretor Edukasaun Munisipiu Manatuto, Patricio da Cruz Quintao hatete, total profesores neebe ME koloka mai iha Manatuto nee hamutuk 100 resin, nunee kona-ba sira nian hela fatin nee mak balu aluga uma, balu komunidade oferese fatin gratuita ba sira hodi hela, tanba seidauk iha rezidensia ba sira.
“Ita nian profesores neebe koloka mai iha Manatuto nee kuaze 100 resin, sira nian hela fatin nee balu ita nian komunidade oferese gratuita ba sira, maibe balu mak aluga ema nian uma,” nia afirma.
Nia akresenta, sira halao atividades aprendizajen iha eskola neebe mak sira hanorin, nee duni sira idak-idak halao knaar lao hanesan baibain, liu-liu halao ensinu aprendizajen ba estudantes sira.
(jac)
