DILI, STLTIMORLESTE.com – Profesores no estudantes husi Eskola Sekundária Jerál (ESJ) 12 de Novembro, Becora, sei partisipa iha misa agradesimentu ne’ebé realiza aban, 12 de Novembru 2026, iha Igreja Motael, Dili, atu komemora Loron 12 de Novembru.
Diretór ESJ 12 de Novembro, Marculino Menezes Babo hato’o informasaun ne’e ba STL, iha Kuarta-feira (11/11/2026).
“Aban ami sei partisipa iha misa iha Motael. Depois misa, ami sei akompaña no lori ai-funan ba Santa Cruz. Atividade seluk iha ami-nia eskola laiha, maibé iha loron 13 mak ami sei selebra aniversáriu eskola nian,” nia esplika.
Marculino hatutan katak, maski aban la iha atividade selebrasaun iha eskola, maibé professores no estudantes hotu sei partisipa iha misa agradesimentu.
Enkuantu ne’e, iha loron 13 de Novembru, eskola sei organiza atividade komemorativa ba aniversáriu eskola nian, inklui serimónia hasa’e bandeira no entrega prémio ba estudantes sira.
(jac)
