DILI, STLTIMORLESTE.com – Promosaun ba Juiz sira husi Segunda klase atu ba iha primeira klase, prosesu sei lao hela.
Tuir Prezidente Tribunal Rekursu, Afonso Carmona katak, promosaun ba Juiz sira prosesu sei lao hela, maibe sira neebe segunda klase ona sei haree mos ho sira nia tinan servisu, inklui relatoriu husi Inspetor sira kona-ba Inspesaun neebe halao ba sira, depois mak Konselhu Superior deside Juiz ida neebe mak bele ba iha primeira klase.
“Kestaun ida nee seidauk bele koalia, presiza Konselhu mak deside, hau dehan deit prosesu lao,” dehan Carmona ba jornalista sira iha Kaikoli, Segunda (09/06/2025).
Nia hatutan, inspesaun Juiz sira nee liga ho Juiz sira nia servisu, halo ba Juiz sira nia servisu prosesu neebe Juiz sira finaliza mak Inspetor mai halo inspesaun ba prosesu, prosesu uluk termina tiha no agora tinan 5 ona tenke halo fali inspesaun foun, agora lao hela rezultadu seidauk sai.
Sublina tan, Inspetor sei halo tiha inpesaun hotu mak relata ba iha Konselhu hodi deside, maibe ita seidauk too konkluzaun katak, se mak valor diak no se mak valor aat, Konselhu prepara aan hela liga ho atu halo promosaun ba Juiz sira iha Tribunal Supremu, tanba agora ita sei iha deit Tribunal Rekursu.
Carmona afirma, sei hein kuandu rezultadu inspesaun husi Inspetor sira fo sai mak foin halo promosaun, seidauk hatene banhira mak Inspetor hatama rezultadu, tanba Juiz nain hira kedan too agora seidauk relata ba Konselhu. No Konselhu lao nafatin, tanba sira nia avaliasaun uluk iha hela seidauk apresia, no sei haree ida nee atu termina Juiz neebe mak bele promove ka lae.
Tuir prazu ba inspesaun iha loron 90 tenke relata ona ba Konselhu, maibe too agora seidauk ho nunee PTR sei haree asuntu sira nee hotu, no relatoriu preleminar antes neebe iha, tanba nee prosesu sei lao hela.
Iha fatin ketak, Akademiku UNTL, Rafael de Jesus dehan, presiza duni halo promosaun ba Juiz sira, tanba ohin loron iha Tribunal Rekursu iha Juiz neebe nia numeru seidauk sufisiente.
“Tribunal Rekursu iha numeru Juiz neebe seidauk sufisiente, se halo promosaun ba Juiz tuir klase neebe iha, Juiz balu bele ba apoiu fali servisu iha Tribunal Rekursu,” dehan nia.
Reforsa tan, ohin loron ema barak mak hakarak buka justisa, tanba nee aumenta numeru autor judisial atu bele apoiu servisu iha Tribunal Primeira Instansia sira, kuandu Juiz sira neebe segunda klase pasa ba iha primeira klase.
(ter)
