DILI, STLTIMORLESTE.com – Ro Militár Jako neebe foin dadaun Governu hamutuk ho Komando FALINTIL – Forsa Defeza Timor Leste (F-FDTL) husik iha tasi Beau, Postu Administrativu Laklo, Munisípiu Manatutu, foin lalais nee seidauk bele halo operasaun iha tasi laran hodi kontrola atividade ilisitu sira.
Komponente Navál Komodoro Higinio das Neves hateten, razaun ro militár referida seidauk bele halo operasaun tanba tekniku husi Xina sei mai halo atualizasaun ikus liu, monta tan instrumentu balun tan hanesan jerador ba, molok ro nee halo operasaun.
“Agora sei hein oituan tekniku mai halo atualiza jerador prinsipal sira nee para hotu-hotu lao diak mak ita bele opera ona. Semana rua tan ita bele opera ona,” hatete Komponente Navál Komodoro Higinio das Neves ba jornalista sira iha Kuartel Jenerál F-FDTL fatuhada, Tersa (25/08/2026).
Nia tenik, ro nee buat hotu-hotu diak ona, maibe iha buat balun falta, tanba nee tekniku sira presiza atualiza tiha lai mak foin halo operasaun.
Nia esplika, tanba ro militár nee halo manutensaun total, troka hotu motor ro nian nee, tanba nee bainhira atu halo operasaun presiza halo atualizaun ikus ba sistema hotu iha ro laran mak foin halo operasaun.
“Manutensaun troka motor foun, entaun tenkeser atualiza fali iha sistema sira nee hotu-hotu, tenkeser funsiona diak para kuandu labele sirkuitu, kuandu sirkuitu entaun nia keima ona, entaun presiza halo atualizasaun mak nia foin opera,” nia informa.
Komodoro Neves deklara, agora dadaun ro militár seidauk bele halo operasaun no dadaun hasai fali ona husi tasi mai rai maran para tekniku mai husi Xina sira mai atualiza tiha sistema sira hotu tiha bele navega ona.
“Nee mak ita hein semana ida ka rua tan ita bele navega,” nia hatutan.
(jen)
