KOVALIMA, STLTIMORLESTE.com – Sentru Saude Tilomar iha Postu Administrativu Tilomar, Munisípiu Kovalima, iha deit kama partus ida hodi atende ba inan isin rua sira.
Liafuan nee haktuir husi Parteira Sentru Saude Tilomar, Beatriz Nunes ba STL iha Tilomar, Segunda (09/12/2024).
Nia dehan, durante nee atendimentu lao diak, maibe kona-ba ekipamentus mak menus liu, hanesan kama partus. Daudaun nee sira iha deit kama ida hodi fo atendimentu ba inan isin rua sira.
“Kona-ba kama hau kestiona hela deit, antes de ida nee hau mos toma konta ba Saude Materna Infantil iha Munisípiu, hau foin muda mai iha nee fulan rua, maibe kama partus agora daudaun ida deit,” hatete nia.
Nia esplika, kama partus nee mos ho kondisaun aat ona. Sira haruka ona pedidu ba Servisu Saude Munisípiu Kovalima, no lori ba Ministeriu Saude, maibe dehan iha armazen laiha.
Nia informa, kona-ba kama sira neebe inan sira mai atu deskansa iha oras 24 nia laran nee iha, maibe ba fali partus nee mak laiha, tanba nee bainhira inan sira mai mak nain rua no tolu iha loron ida deit, nee sei fo difikuldade ba sira.
“So kama sira neebe mak hanesan inan sira nee partus normal, ita haruka deskansa ba iha 24 oras nia laran nee iha. Ba iha fali kama partus nia nee laiha, bainhira inan sira mai nain rua ka tolu iha loron ida deit, nee mak difikuldade tebes ba ami. Karik iha nain rua no tolu ona, entaun ami uza maneira para ida fali neebe mak seidauk nee husik sira hein ba iha kama vasina nian, atu nunee ida neebe mak besik ona mak uluk. Situasaun sira nee mak akontese durante nee.
Iha fatin hanesan, Servisu Saude Munisípiu Kovalima, Domingos Siqueira rekonhese kona-ba menus ekipamentus nee los duni, maibe daudaun iha Sentru Saude balun iha Kovalima atende ona.
(jen)
