DILI, STLTIMORLESTE.com – Governu liu husi Sekretariu Estadu Komunikasaun Sosial (SEKOMS) fo apoiu orsamentu ba jornal 5 ho montante rihun US$ 192.
Lia hirak nee hatoo husi SEKOMS, Expedito Dias Ximenes liu husi nia diskursu, bainhira halo vizita kortejia ba media Suara Timor Lorosae (STL) iha Surikmas, Dili, Segunda (13/01/2025).
“Distribuisaun ba jornal ba munsipiu nee kontinua nafatin no governu tau nafatin osan ba jornal rihun US$ 192 ital ba jornal 5 nee, durante nee fahe hanesan maibe tinan ida nee hau fo orientasaun ba iha DNDI atu haree sira nia leitores, se STL leitores barak liu konserteza distribuisaun barak, se Timor Post barak liu entau nia ditribuisaun nee tenke lao hanesan nee, labele rihun US$ 192 nee labele tuir tinan uluk 2024 nee fahe hanesan deit, sira neebe mak leitores barak liu mos hetan hanesan, ezemplu Dili Post nia leitores menus,” katak Sekretariu Estadu.
Iha biban governante nee dehan, objetivu ohin mai iha STL atu rona preokupasaun hotu neebe iha no remata vizita kontinua vizita ba iha media Indepedente, no aban kontinua ba Timor Post no ba Dili Post, ikus liu husi Diariu Nasional hodi rona hanoin hotu.
“Hau komprende ho dezenvolvimentu dijital, agora plataforma dijital nee atu koalia kona-ba atualidade nee sira lalais liu, tanba sira nia lalais liu dala barak mos fake news hoaks sira nee dala barak mosu, maibe jornal, televizaun, radio sira nee media konvisional, sira nee ba hau bolu hanesan konfirmasaun ikus, SMNESW ema bele haree lalais, Lafaek News bele lalais, hatutan bele lalais, maibe hau dehan aban hau lee lai STL lai, hau lee lai Timor Post, no orsida kalan hau sei nontong lai RTTL, GMN buat neebe sai nee los ka lae, ida nee mak konfirmasaun ikus ba informasaun,” katak governante nee.
Governante nee hatutan, media konvesional Governu sempre tau konfiansa hodi kontinua lao, tanba nee mak ohin mai uluk STL no preokupasaun hotu CEO STL hatoo ona, no Prezidente Republika mos fo hanoin ba SEKOMS karik bele apoiu osan kes deit, maibe iha prosesu aprovizionamentu no prosesu orsamentu estadu nee dala barak la fo dalan.
“Prezidente Republika mos hatete ba hau, tanba saida mak o la fo deit osan kes ba media sira mak jere rasik, neebe hau dehan ba Prezidente Republika tuir hau nia hanoin nee hau mos hakarak hanesan nee, maibe hau ba konsulta ho Ministeriu Finansas atu konta nia responsabilidade nee oinsa, tanba nee mak Governu haree deit katak, ita fo servisu Governu selu ida nee forma ida atu bele iha konta responsabilidade, tanba nee hau hatoo agradese ba maun Salvador ho STL neebe tinan naruk STL moris, maske atu monu maibe sae fali, iha problema oituan hadia sae fali, maibe ezistensia nee nafatin naran STL nee ema la haluha, STL ema nafatin buka nunee mos Timor Post, INDEPEDENTE no Dili Post jornal neebe foun, no jornal nia kontribuisaun nee hanesan uluk, “ katak nia.
Nia hatutan, STL iha media Jornal, TV, Oline, Live, Radio, media plataforma konverjensia ida nee hatudu katak sei hasoru avansu teknolojia makaas, maibe importante forsa mak kualidade informasaun ba iha publiku nee.
Iha biban nee CEO STL, Salvador Januario Soares hatete, iha Oitavu Governu nia tempu iha situasaun Covid-19 Governu la fo osan direita ba media sira, maibe liu husi kontratu, liu husi pajina ida husi pajina ida nee publika durante fulan ida, no kontratu durante fulan 10 kada fulan rihun US$ 10 nee para aguenta jornal iha momentu difisil isu Covid-19 nee barak.
No agora apoiu sira nee fo osan direita la diak maibe liu husi isu IX Governu Konstitusional sira nia nee liu-liu programa SEATOU nia nee, neebe dala barak dehan laiha Indemnizasaun, maibe Primeiru Ministru, Kay Rala Xanana Gusmão dehan iha, bele publika iha pajina ida hodi publika, nunee povu mos bele hatene katak iha duni kompensasaun.
(eme)
