SEKOMS Halao Vizita Ba STL

Sekretariu Estadu Komunikasaun Sosial (SEKOMS), Expedito Dias Ximenes halao vizita kortejia ba media STL, hodi hasoru malu ho CEO STL CORP, Salvador Januario Soares, iha Surikmas, Dili. (Foto: STL/Emerenciana Pinto)

DILI, STLTIMORLESTE.com – Sekretariu Estadu Komunikasaun Sosial (SEKOMS), Expedito Dias Ximenes halao vizita kortejia ba media Suara Timor Lorosae (STL), hodi haree direita kondisaun neebe STL hasoru durante nee.

Bainhira remata vizita, SEKOMS, Expedito Dias Ximenes ba STL iha knua Surikmas Segunda nee (13/01/2025) hatete, programa vizita nee planea ona husi SEKOMS hodi halo vizita ba media hornal 5, maibe ohin vizita uluk media STL depois kontinua ba media seluk.

“Hau planea hela halo vizita ba media hotu-hotu iha 2025, maibe hahu uluk iha media jornal 5 hanesan STL Independent, Timor Post, Dili post ho diariu Nasional, tanba sa mak hau ba uluk jornal 5 nee, tanba iha akordu no servisu hamutuk ho Governu atu halo distribuisaun ba jornal neebe mak durante nee lao no governu kontinua lao, ohin hau mai vizita uluk STL hotu tiha kontinua ba iha Indepedente, atu bele rona besik liu tan difikuldade obstaklu neebe jornal sira hasoru, liu-liu sira nia jestaun iha laran nomos oinsa sira nia difikuldade iha kobertura no kontiudu hakerek notisia,” dehan Expedito.

Nia hatutan, iha vizita nee hodi observa difikuldade neebe mak media nee hasoru liga ho kobertura no hakerek notisia, liu-liu sira nia koneksaun sira, fahe jornal ba iha munisipiu hotu iha postu administrativu too iha suku sira.

“Ohin hau rona direita informasaun husi Senhor Salvador hanesan CEO iha STL, iha sujestaun balu neebe Irmaun Salvador hatoo no sei rona husi jornal sira seluk, depois hau sei hatoo ba Konselhu Ministru atu bele haree, tanba iha difikuldade barak mak jornal sira atravesa durante nee ho avansu teknolojia neebe makaas ho televizaun oin-oin plataforma dijital Online sira, presiza mos fo atensaun ba media konvesional privadu sira, liu-liu ba jornal neebe dala barak ema dehan katak jornal nee too ona tempu atu lakon maibe hau hatete ba STL katak jornal, Televizaun, Radio, sei nafatin sai konfirmasaun ikus ba publiku kona-ba informasaun,” katak governante nee.

Governante nee husu nafatin hadia kualidade informasaun, hadia kualidade kobertura no fortifika formasaun ba iha jornalista sira.

Iha fatin hanesan, CEO STL, Salvador Januario Soares hatoo agradese ba SEKOMS, Expedito Dias Ximenes ho ekipa neebe ohin halo vizita kortejia ba media STL, hodi haree direita difikuldade neebe mak media nee enfrenta hodi bele fo solusaun.

“Ami agradese tebes tanba dadersan ida nee mai vizita iha ami nia fatin, fatin mak hanesan nee, nuudar ita hotu hatene katak jornal nee iha ona masa senjan waktu senja ona be, ita laiha esforsu masimu ruma karik jornal nee bele dehan sura ona tinan bainhira la hatene maibe ita sura tinan deit ona,” dehan CEO STL nee.

(eme)

Share it :

Leave a Reply

Your email address will not be published. Required fields are marked *