SEM Ainaro Halo Pedidu Husu Apoiu Fasilidade Meza no Kadeira

Meza no kadeira eskola (Foto: Espesial)

DILI, STLTIMORLESTE.com – Servisu Edukasaun Munisipiu Ainaro halo ona pedidu ba Ministeriu Edukasaun (ME) hodi bele husu apoiu fasilidade meza no kadeira ba eskola sira.

Lia hirak nee hatoo husi Diretor Servisu Edukasaun Munisipiu Ainaro, Patricio da Costa Magno ba jornalista STL liu husi telefone, Tersa nee (03/06/2025).

“Tinan ida nee ita halo konstrusaun eskola ida deit, neebe mak agora daudaun sei iha tender hela,. nee duni ita seidauk hatene los, ida tan nee UNICEF mak atu halo, nee presiza eskolar ida iha Ainaro Vila. Kona-ba fasilidade nee mak ami halo ona pedidu ba ME, maibe komesa rezolve ona husi Edukasaun pre eskolar ho ensinu baziku,” nia deklara.

Nia hatutan, pedidu ba ME husu apoiu fasilidade meza no kadeira ba edukasaun pre eskolar, ensinu baziku, ensinu sekundariu no tekvo, pedidu nee hatama iha fulan Fevereiru tinan ida nee, maibe fo ona meza no kadeira ba edukasaun pre eskolar haat ou lima ona, inklui tekvo ida, seluk nee hein deit.

Iha fatin seluk, Diretor Diresaun Nasional Infraestrutura no Edukativu iha ME, Helio Lopes hatete, kadeira no meza sufisiente ona hodi responde eskola sira neebe laiha kadeira no meza, inklui sala de aulas foun sira neebe konstrui, laiha kadeira no meza, presiza atu prienxe ba sala de aulas foun sira neebe konstrui, kadeira ho meza eskola barak eziste hela, falta de jestaun para kontrolu sasan sira nee.

“Tanba nee Ministeriu responde deit ida neebe laiha duni no ida neebe kondisaun aat ona, tanba kadeira ho meza ita uza tempu kleur, ida neebe aat ita presiza troka kadeira ho meza foun neebe iha, ida neebe diak kontinua utiliza husi estudantes sira, ida neebe mak sala de aulas foun laiha kadeira no meza, tuir pedidu no verifikasaun husi Ministeriu bazea ba dadus neebe mai husi eskola, Munisipiu, ekipa sei halo verifikasaun, depois mak ita halo distribuisaun,” nia afirma.

(jac)

Share it :

Leave a Reply

Your email address will not be published. Required fields are marked *