BAUKAU, STLTIMORLESTE.com – Servisu Edukasaun Munisipiu (SEM) Baukau hetan alokasaun orsamentu hamutuk milhaun US$ 2 resin ba implementasaun programa merenda eskolar tinan 2025 nian.
“Programa merenda eskolar tinan ida nee ita hetan alokasaun hamutuk US$ 2 milhaun ital, nee sufisiente hela atu implementa,” informa Diretor SEMB, Afonso dos Santos da Costa ba STL iha nia knaar fatin Vila Nova, Segunda (28/01/2025).
Nia sublina, benefisiariu ba programa merenda eskolar ba anu letivu 2025 iha Baukau estudante hamutuk rihun 32 resin, husi eskola 200 resin neebe numeru estudante refere rejistu husi Pre-eskolar too Ensinu Baziku Terseiru Siklu sira.
Nia fundamenta, programa refere implementa kada estudante husi loron Segunda-Sesta sei han US$ 0,42 sentavus, neebe Edukasaun Baukau fo estimasaun kada loron eskola sei gastu liu rihun US$ 14 ba produtu tein nian.
“Estudante sira sei han deit hahan lokal sira, tuir mata dalan neebe iha makaas liu haforsa ita nia estudante sira, seluk labele, bandu liu mak hahan kalen sira husi fabriku nee, neebe ida la tama mata dalan nee bandu, hahan lokal nee bele,” Afonso deklara.
Diretor nee informa, menu programa merenda eskolar anu letivu 2025 mantein ho anu letivu 2024 nian, neebe bandu produtu importadu sira, liu-liu hanesan sosis, naan manu (Ayam Potong) no seluk tan neebe kontaminadu ho kimiku.
(EST 2)