DILI, STLTIMORLESTE.com – Servisu Edukasaun Munisipiu (SEM) Manatuto hatama ona lista profesores reforma 61 ba Rekursu Umanus Ministeriu Edukasaun (ME).
Direitor Servisu Edukasaun Munisipiu Manatuto, Patricio da Cruz Quintão hatoo kestaun nee ba STL liu husi telefone, Kinta nee (08/05/2025).
“Tinan nee ami nian profesores hamutuk 61 mak tama ba iha idade reforma, nee iha nivel eskolaridade hotu, dadus nee ita identifika iha tinan ida nee hodi hein ba implementasaun reforma obrigatoriu nee, sira nee maioria idade 65 ona, balun idade liu tan ona, balun 70 mos iha,” dehan nia.
Patricio dehan, husi numeru 61 balun hatama ona karta rekerimentu no balun seidauk, profesores idade reforma 61 nee mane 32 no feto 29, husi nivel eskolaridade iha Munisipiu Manatuto, lista profesores reforma nee hatama ona ba Rekursu Umanus ME, lista nee hatama iha tinan ida nee.
“Ita hatama lista nee ba Ministeriu Edukasaun hodi bele hein prosesu reforma obrigatoriu neebe mak sei halao iha tinan oin, tanba nee rekerimentu nee sira hatama direita ba iha rekursu umanu, la liu husi ami ida,” nia esplika.
Iha fatin seluk, Diretor Nasional Rekursu Humanu ME, João Amaral hatete, dadus profesor reforma neebe ohin mensiona nee bele aumenta, tanba husi parte Rekursu Umanus sei kontinua simu dadus profesores reforma ninia.
“Ita sei loke tan rekrutamentu tuir vagatura neebe mensiona, tanba komesa Janeiru 2026 obrigatoriu tenke lao, sira neebe mak iha bolsa nee koloka seidauk too, entaun ME tenke rekrutan tuir vagatura tuir pensaun obrigatoriu, tanba tuir ME nian nee iha mil ou besik dois mil neebe sei reforma iha 2026, nee obrigatoriu ho idade 65 tuir lei neebe mak vigora,” nia dehan.
Iha parte seluk, Diretor EBC Manleuana, Carlos Correia hatete, agora daudaun profesores nain 3 ou 4 mak tama ba idade reforma, tanba profesor balun 70 resin ona, sira nee hanesan profesor da turma.
(jac)
