DILI, STLTIMORLESTE.com – Ministru Koordenador Asuntu Ekonomiku, Fransisco Kalbuadi Lay, dehan setór privadu sai xave ba dezenvolvimentu sustentabilidade ekonomia Timor-Leste.
Ministru Koordenador Asuntu Ekonomiku (MKAE), Fransisco Kalbuadi Lay, afirma katak setór privadu iha papel importante tebes ba desenvolvimentu sustentável ekonomia Timor Leste nian.
Liafuan ne’e hateten bainhira MKAE hamutuk ho TradeInvest Timor Leste, entrega deklarasaun benefísiu ba empreza tolu iha edifisiu Farol, Dili, Tersa (25/08/2026).
Empreza tolu ne’ebé simu deklarasaun ne’e mak Elegant Marble Group (EMG), Prime Timor no Green Pzz, Lda. Investimentu sira ne’e inklui indústria mármore, pekuária no setor turizmu.
Kalbuadi Lay hateten, nvestimentu husi emprezáriu lokal no investidor internasionál sira bele ajuda diversifika ekonomia nasional, hodi reduz dependénsia ba setor petróleu.
Diretur Ezekutivu TradeInvest Timor-Leste, Duilio Marino G. Araujo, hateten EMG investe US$51 millaun ba indústria mármore iha Munisípiu Manatuto, liuhusi parseria ho Murak Rai Timor (MRT, E.P.).
Enkuantu Prime Timor, empreza Timor oan, halo investimentu iha pekuária iha Suai, liuliu ba kriasaun karau.
Green Pzz, Lda, investe entre US$4,7 to’o US$5 millaun ba konstrusaun hotel/resort iha Suku Lauhata, Munisípiu Likisá. Konstrusaun ne’e agora daudaun atinji ona 30–35 porsentu.
Rony Joel Barreto da Costa, Diretur Kompania Green Pzz, Lda, espera konstrusaun bele remata iha finál 2027 ka inísiu 2028, atu hahú operasaun.
Nia mos husu apoiu Governu, liuliu iha fasilitasaun importasaun materiál konstrusaun, hodi ajuda setor privadu kompleta projetu sira iha tempu badak.
(dom)
