DILI, STLTIMORLESTE.com – Joven Rezistensia, João da Silva “Shoque” afirma, ema rezistensia neebe sai liderador, labele sai fali hanesan cavalo mandado, tanba mai atu servi no responsabiliza ba interese publiku tomak.
“Hanesan ema lider ida mai atu kontribui, atu servi no responsabiliza, laos atu sai fali cavalo mandado, atu rona fali orden nee sala, tanba Polisa Nasional Timor Leste (PNTL) ho FALINTIL-Forsa Defeza Timor Leste (F-FFDT) mak servisu tuir ordem, maibe hanesan ema lider hanoin atu lidera, organiza, laos atu sai fali seguransa,” dehan Joven Rezistensia, João da Silva “Shoque” ba jornalista sira iha Kaikoli, Tersa (28/01/2025).
Tuir Joven Rezistensia nee, ema lider rezistensia hatene prinsipiu durante tinan 24 iha ai-laran, nia halo saida, hanoin saida ba povu, mak mate ka moris ukun rasik aan, signifika atu luta ba lia los, atu dehan lae ba injustisa.
Tanba prinsipiu hotu-hotu, povu mak sai alvu prinsipal iha estadu ida nee, tanba nee ema lider rezistensia ida laos atu sai fali cavalo mandado nee la diak, tanba lider mai atu lidera, servi, dezenvolve ba nia povu, laos mai atu defende deit interese ema ida nian, maibe ba povu tomak.
Entretantu, Jerasaun Rezistensia, Miguel Tavares da Conceição afirma, hanesan lider tenke konsistente ho lia loos ba nia povu, tanba povu presiza justisa atu moris livre husi ukun aan ida nee, maibe lider neebe mai hanoin deit nia aan, nee lider korupsaun no nepotizmu, hodi destrui espiritu nasionalizmu no patriotizmu iha rai ida nee.
Lider laos sai fali traidor ba nia povu, maibe lider mai atu lidera, servi no responsabiliza ba interese povu nian, hodi povu bele moris ho estabilidade politika ba dezenvolvimentu nasional, tanba povu mai ho interese atu moris ho dignu, moris ho lia los, tanba lider laos mai atu sai fali seguransa ba ema nee sala.
“Ema neebe defende lia los mak lider neebe sente failadu, sai husi nia kargu ho razaun hanesan Prezidente Autoridade Munisipiu Dili nian, katak lei mak sai autor ba dezenvolvimentu, ema hotu iha lei nia okos, maibe lider ida tenke hatene nia kompetensia, katak lian neebe sala, signifika injusta ba povu, lian neebe los ida nee mak povu nia hakarak,” nia afirma.
(EST 1)