DILI, STLTIMORLESTE.com – Kuarta Feira Sinzas sai sinal aprofundu fiar sarani hodi tama ba tempu kuarezma hodi refleta Nai nia domin, hodi hamoris orasaun no agradesimentu no maneza aan lo-loos hodi hadera-an no halo asaun karidade.
Lia hirak nee hatoo husi Padre Richardo Pasang, SVD liu husi nia refleksaun ba loron kuarta (05/03/2025) Joel. 2 : 12 – 18 2 Kor. 5 : 20 – 6, 2 Mat. 6 : 1 – 6, 16 – 18 hatete, Loron Kuarta Feira Kinzas sai sinal aprofunda fiar sarani nian hodi hahu tempu kuarezma periodu ida importante tebes iha igreja neebe sai periodu atu reflete klean liu tan Nai nia domin, periodu atu hamoris espiritu hodi halo orasaun no agradesimentu.
“Periodu atu maneja lo-loos ita nia hakarak isin nian (hadera-an) no mos periodu atu sai husi ita nia aan rasik hodi fo tulun ba ema seluk neebe presiza (asaun karidade).
Atividades espiritual relasaun ho ita nia ezistensia nuudar fiar nain, hirak nee sai hanesan atividades preparasaun klean atu selebra festa Paska Kristaun nian. Ita hahu retiru boot no naruk durante loron haat nulu nia laran hodi reflete no reorganiza ita nia moris ba Maromak ho haraik aan hodi husu Maromak nia miserikordia akompanha ita atu halao ita nia moris ho integridade no lo-loos,” katak Padre.
Padre Richardo dehan, Sente ka la sente, konsiente ka lae, kuarezma tinan ida nee sai hanesan tempu grasa ba sarani, tanba halao hamutuk ho tinan Yubilee nuudar Peregrinos da Esperansa. Tinan Yubilee mak tempu Nai hatudu lo-loos Nia miserikordia, domin no laran luak atu perdua, no haraik grasa ba ema nuudar sarani peregrinos da esperansa..
“Atu bele hetan domin boot liu tan, atu bele hetan grasa boot no perdaun, kuarezma tinan ida nee mak tempu lo-loos ba ita atu reflete, halo orasaun lo-loos, haderar aan lo-loos no haboot asaun karidade husi fuan. Tan nee, Profeta Joel iha Primeira Leitura husu ita nuudar peregrinos da esperansa iha tempu kuarezma nia laran atu fila imi laran ho neon mai hau, hodi haderar aan hodi tanis no halerik hakanek imi laran lalika les imi nia unuk. Fila imi laran ho neon tomak ba imi Nain, ba imi nia Maromak, tan Maromak diak no laran luak tebes Nee mak Nai nia haruka ba ita nuudar peregrinos da esperansa iha tempu kuarezma atu bele hetan grasa yubiliee ba ita,” dehan padre.
Padre Richardo dehan, Profeta Joel husu ema atu halo peregrinasaun fila fali ba Maromak ho fuan no laran tomak tanba arrependimento laos so deit serimonia rituais neebe ema bele haree ho matan (parte exterior) maibe nuudar peregrinasaun ou jornada espiritual (parte interior) ba mudansa profunda kurasaun.
“Nai Maromak hakarak atu ita hakanek ita nia fuan, hatudu lolos husi fuan arrependimento iha Nia futar oin ba ita nia sala sira tomak no fila-an ba Nia tanba Nai nakonu ho domin no miseriKordia. Nee mak tempo diak ba ita atu arrepende no simu grasa salvasaun husi Nai. Iha Segunda Leitura, Saun Paulo fo hanoin ita hotu peregrinos da esperansa katak ita hotu mak mensageiros de Kristu neebe Nia bolu atu badame malu ho Maromak. Liu husi Jesus Kristu, ita simu ona domin no kmanek oin-oin, tan nee keta halo momentu liu nee saugati husi ita moris! Keta husik Maromak liu daudaun iha ita nia moris maibe Konvida Maromak hatur aan iha ita nia fuan hodi transforma ita sai peregrinos foun, tanba tempu nee mak tempo grasa, tempo Nai rona ita, tempu maksoin ba ita. Maromak rasik hateten katak iha tempu diak Hau rona o iha tempu Maksoin, Hau mai tulun o, oras nee daudaun mak tempu diak, oras nee daudaun mak tempu Maksoin,” dehan Padre.
Liu husi Evangelhu, Nai Jesus Kristu hanorin ema kona-ba maneira neebe los atu atu fo esmola, hamulak no hadera-an. Nai Jesus Kristo sublina lolos importanKia sinseridade klean ema nia fuan hodi halo peregrinasaun Kuaresma ida nee. Buat hotu neebe halo atu fo ksolok ba Maromak laos atu hetan hahi husi ema seluk. Tan nee, keta fo esmola ou keta halo asaun karidade atu show ba ema seluk. Keta show mos katak ema badinas hamulak, keta show mos katak hadera-an. Halo buat hotu-hotu husi fatin hakmatek, husi silensiu tanba Maromak hatene buat hotu neebe ema halo. Maromak la persiza show ema nia aan maibe persiza fuan mos atu arrepende.
Nee duni, Kuarta Feira Kinzas loron ohin, husu hotu-hotu atu hahu nia peregrinasaun kuarezma da esperansa ho arrependimentu no haraik aan. Mai hotu hotu fila-fila ba Maromak ho fuan no laran tomak. Mai hakanek fuan laos unuk hodi Konfesa sala sira. Mai halao tempo grasa nee ho orasaun klean, hadera aan no fo esmola ho fuan tomak. Mai halao buat hirak nee hotu ho silensuo iha Nai nia futar oin, Nia sei haraik mai ema premiu ou frutus husi peregrinasaun nuudar peregrinu da esperansa iha tempu kuarezma nee nia laran.
(eme)
