DIL, STLTIMORLESTE.com – Kuarta Feira Sinzas ho ahi kdesan neebe kose iha rentos ho sinal kruz, hatudu katak Maromak hatudu laran luak hodi perdua ema nia sala, hodi sai kriatura neebe foun.
Lia hirak nee hatoo husi Amu Selebrante Padre Armindo Brito liu husi nia omilia, iha Kapela Saun Pedro no Saun Paulo Fetumeta, Kuarta nee (05/03/2025).
Nia hatete, Kuarta Feira Sinzas nuudar odamatan boot hodi tama ba kuarezma no sei taka ho misteriu paskua, ida nee hatudu katak Maromak hatudu nia laran luak hodi perdua ema nia sala.
“Kuarta Feira Sinzas nee odamatan boot ida ba kuarezma nia neebe sei taka ho misteriu paskua, iha leitura sira neebe ohin ita rona husi primieru leitura, segunda leitura no evanjelhu fo mai ita nia sentidu lo-loos husi kuarezma nia liu husi sinzas neebe ita simu nee, ita haree momos ona katak ita ema rai rahun, husi rai rahun ida nee mak ita hetan salvasaun ho sinal kruz neebe marka iha ita nia rentos ho ahi kdesan neebe marka ho sinal kruz sentidu boot ba kuarezma nia mak Maromak nia laran luak, Maromak nia domin neebe boot laiha sasukat ba ita ema,” katak padre Selebrante.
Padre nee hatete, hanesan ema hotu hatene katak ahi kdesan nee restu husi karbonizasaun nia (sisa sisa pembakaran) ahi sira neebe sunu nia restu mak ahi kdesan nee, ahi kdesan uza ba saida? Ema barak la uza atu tau fali ba ai horis nia hun mos la serve. Maibe so inan sira neebe matenek mak bele deskobre katak ho sinzas ho ahi kdesan nee bele halo buat boot ida iha vida uma kain nia liu husi kojinha uma kain nia.
“Sinzas nee Maromak hatudu nia laran diak, laran luak kasu ema nia sala, perdua ita nia sala, halo ita sai kriatura neebe moos halo ita sai kriatura neebe foun, ho ahi kdesan natureza neebe folin laiha maibe ho ahi kdesan folin laiha nee Maromak hakarak buat foun ida iha ita ema nia moris fo ba ita dignidade ida, lezado ida neebe foun sala laek hodi ahi kdesan nee hodi kruz kasu ita nia sala,” katak Padre.
Nia dehan, kuarezma katak tempu atu konfesa no tempu neebe atu muda aan, katak ho sinzas nee hanesan forsa ida atu muda aan.
“Tempu kuarezma nee mos halo ita idak-idak atu halo transformasaun, Maromak lori ita bele muda aan, Maromak salva ita no ita mos idak-idak buka sala ita nia aan, tanba nee mak ohin segunda leitura hatete katak atu imi labele hetan saugati deit esperansa Maromak nia laran diak, katak Maromak ezije ita ho ita nia esforsu rasik, ita nia senseridade atu muda ita nia aan tuir Maromak nia hakarak, tanba nee mak obrigasaun neebe mak ita halo los duni katak nee forsa Maromak nia ba ita ho ita nia senseriedade,” katak Padre.
Nia hatutan, saida mak ema bele muda no transforma? Laos muda kuantidade hahan ninia no laos muda kualidade hahan nia, maibe muda ema nia fuan no muda hahalok hatudu liu husi liafuan, fuan neebe simu ho realidade ba Maromak nia laran diak, Maromak nia laran luak tanba kasu ema nia sala hodi terus no mate iha kruz. Iha tempu kuarezma nee ema mos presiza muda nia hahalok aat sira, husi koalia liafuan neebe diak, hatudu hahalok neebe diak no fo sasin ba buat neebe diak, nee mak Maromak nia hakarak.
(eme)
