BAUKAU, STLTIMORLESTE.com – Sekretariadu Tekniku Administrasaun Estatal (STAE) Munisipiu Baukau simu ona lista kandidatu nain 7 ba suku foun 3, neebe sei realiza eleisaun suku iha tempu badak.
Diretor STAE Munisipiu Baukau, Natividade Freitas Guterres hatete, relasiona eleisaun suku neebe akontese iha tempu badak nee, parte STAE Munisipal halo ona preparasaun hanesan halo sosializasaun ba Lei Nu.09/2016 no Diploma Ministerial kona-ba loron eleisaun nian.
Aleinde nee mos fasilita ona formasaun ba entidades sira husi Suku foun 3 hanesan Builai, Kaibada inklui Werumata, prepara meza eleisaun nian iha kada suku, neebe STAE Munisipal simu ona lista kandidatura husi suku 3 refere.
“Nee mak iha Suku Builai nian kandidatu nain 3, Kaibada kandidatu nain 3 feto 1 mane 2, iha parte Werumata kandidatu uniku, ami rekolha ona sira nia boletin votus lori ba Dili aprova ona halo emprimisaun neebe sei halo eleisaun iha 25 Janeiru,” hatete Natividade ba jornalista sira iha Vila Nova, Segunda (13/01/2025).
Nia sublina, lista neebe parte STAE Baukau simu husi suku foun 3 refere kandidatu hamutuk nain 7, neebe Suku Builai iha kandidadu nain 3 kompostu feto 1 mane 2, Kaibada mane nain 3 no Werumata kandidatu uniku mane 1, nunee lista relata ona ba nasional no hetan aprovasaun, neebe daudaun iha ona faze emprime.
Tanba tuir planu loron 21 Janeiru nee parte nasional sei halo distribuisaun ba material sensitivu no laos sensitivu, hodi kontinua halo pakotementu iha loron 22 too 23 Janeiru hafoin desloka ba suku 3 refere hahu eleisaun iha loron 25 Janeiru 2025.
Entretantu tuir dadaus eleitores neebe atu partisipa iha eleisaun Suku 3 refere husi Suku Builai 1.700 resin, Kaibada 1.700 resin, enkuantu Werumata 300 resin.
(EST 2)
