DILI, STLTIMORLESTE.com – Ministeriu Publiku (MP) iha nia alegasaun ba krimi Violensia Domestika ho forma Ofensa Integridade Fizika Simples, solista ba iha Tribunal Koletivu atu fo pena suspensaun ba arguidu ho inisial PB, tanba komete krimi hasoru lezada ho inisial DA.
Iha alegasaun loron Segunda nee, Prokurador Hernani Rangel deklara katak, faktus neebe konsta iha akuzaun provadu, bazeia ba iha arguidu nia deklarasaun no lezada nia deklarasaun.
Prokurador haree katak, arguidu halo duni agresaun hasoru lezada, tanba motivu sira nia oan hakarak tuir arguidu ba joga beliar, maibe arguidu la tau atensaun ba sira nia oan.
Prokurador konsidera prienxe duni elementu krimi Violensia Domestika, tanba nee atu halo prevensaun iha futuru, MP husu ba iha Tribunal atu kondena arguidu pena prizaun fulan 4, suspende ba tinan 1.
Enkuantu husi parte Defeza Juvinal Dias haree katak, arguidu foin primeira vez mai iha Tribunal no konfesa ba faktus, tanba nee husu Tribunal atu aplika pena adekuadu ba arguidu.
Rona tiha parte sira, Tribunal adia ba loron seluk hodi rona desizaun.
Tuir akuzasaun neebe iha katak, iha loron 25 Junhu 2023, iha tuku 5 loraik, lezada hetan baku husi arguidu hanesan lori liman tuku dala rua iha ulun parte karuk, no lori liman buti iha lezada nia kakorok.
Motivu husi problema nee tanba deit momentu neeba arguidu atu ba joga bola gulin, maibe arguidu nia oan tanis tuir arguidu hakarak ba hotu, no arguidu la tau atensaun.
Ho ida nee mak halo lezada nervozu hodi koalia, no ikus mai arguidu halo agresaun hasoru lezada.
Konsekuensia husi arguidu nia hahalok nee halo lezada sente moras hodi hatoo keixa.
Tanba nee MP akuza arguidu komete krimi Violensia Domestika ho forma Ofensa Integridade Fizika Simples 145 Kodigu Penal no lei Violensia Domestika nian.
Iha sala julgamentu laran, arguidu konfesa no hahu husi problema neeba too mai agora la iha tan problema ona, tanba sira diak malu no moris hamutuk hanesan feen no laen.
Audensia julgamentu nee prezide husi Juiz Singular Jose Gonsalves, MP reprezenta husi Prokurador Hernani Rangel, arguidu hetan asistensia legal husi Defensor Publiku Juvinal Dias.
(ter)