DILI, STLTIMORLESTE.com – Eskola ESTV-IT 28 de Novembro Becora Díli hetan ona Fundus Operasional Eskola neebe tama ona sira nian konta bankaria eskola nian.
“Ami nia konsesaun eskolar la iha ona, maibe ami agora uza fali Fundus Operasional Eskola no Fundu Operasional Eskola nee tama ona ami nian konta bankaria eskola ESTV-IT 28 de Novembro Becora Díli nian ona, maibe seidauk ezekuta, tanba ami sei husu mata dalan ba ezekusaun Fundus Operasional Eskola nee rasik, hodi nunee lao tuir mata dalan. Ami hetan US$ 20,000.00, maibe sei tuir etapa por etapa,” dehan Diretor Eskola ESTV-IT 28 de Novembro Becora Díli, Tomas Pinto ba STL iha nia knaar fatin, Segunda nee (08/06/2026).
Nia dehan, maibe sira mós iha planu estratéjiku ba eskola ninian durante tinan 1 nian neebe aprova ona husi Ministériu Edukasaun Nasional através husi Secertário Estado do Ensino Tecvo no ESG nian, tan nee mak fundus nee tama iha sira nia konta bankaria nee.
“Ami hetan US$ 20,000.00, maibe sei tuir etapa por etapa, etapa primeiru Janeiru tóo Junhu nian US$ 10.000,” nia dehan.
Nunee mos Diretor Nasional Ensinu Sekundariu iha ME, Benjamin Gomes da Cruz Fernandes hatete, eskola tekvo nee ba husu iha diresaun tekvo nian, tanba diresaun ida nee haree ba iha ensinu sekundariu jeral ninia, nee duni agora nee falta eskola husi Munisípiu Ermera ho Bobonaro mak seidauk foti, tanba iha kode vendor nee iha mudansa oituan, maibe sira tenta katak, semana ida oin nee sira bele foti , maibe eskola hotu-hotu, hanesan eskola sekundariu jeral hotu foti ona konsesaun eskolar.
“Konsesaun eskolar nee tama ona, no sira foin foti osan ba primeiru no segundu trimestre, agora eskola hotu foti hela ona, halo hela ezekusaun, bainhira hotu mak foin bele hatama relatóriu mai iha ministériu, ami mos sei fo tempu ba eskola sira halo ezekusaun, se ami foin fo ohin husu relatóriu, nee dala ruma sira bele inventa relatóriu,” nia haktuir.
(jac)
