DILI, STLTIMORLESTE.com – Kuarta Feira Sinzas nuudar odamatan boot ida ba kuarezma nian neebe sei taka ho misteriu paskua, tanba nee Xefe Estadu Maior Jeneral FALINTIL – Forsa Defeza Timor Leste (F-FDTL), Tenente Jeneral Domingos Raul “Falur Rate Laek” hamutuk ho membru F-FDTL nomos familia militar sira tuir Misa Kuarta Feira Sinzas iha Kuartel Jeneral F-FDTL, Fatuhada, Dili.
“Ba familia boot Ministeriu Defeza no Xefe Estadu Maiór F-FDTL, Tenente Jenerál Domingos Raul “Falur Rate Laek” hamutuk ho ninia Membru F-FDTL inklui mos familia no sarani, ohin ita tama ba tempu kuarezma nian, ita ho ita nia kondisaun moris, ita tenke hakbesik aan ba Nai Maromak laran luak,” hatete Padre Kapitaun Rui Filomeno de Jesus Gomes, SDB liu husi omilia, wainhira prizide misa iha Kuartel, Jeneral F-FDTL, Fatuhada, Dili, Kuarta (05/03/2025).
Nia dehan, tempu kuarezma nee tempu diak ba sarani sira atu haree fali idak-idak nia moris no idak-idak nia kompromisu ba Nai Jesus.
“Kuarezma fo hanoin ita atu tuir dalan ho povu antigu testamentu nian, neebe uluk hatais karon, toba iha rai kesak laran no tuir Jesus, tempu kuarezma tempu di’ak atu konsege haree fali ita nian aan tuir disiplina ruma, no tenke harohan barak liu tan no hakribi sala iha kruz nia oin,” nia esplika.
Nia informa, iha prirmeira litura, Nai konvida sarani sira atu fila ba Maromak, no Maromak bolu idak-idak atu fila ba Nia ho fuan tomak, halo jejum ho tanis no halerik, tanba profeta dehan ema tenke muda duni fuan neebe to’os, ho trasforma idak-idak nian tuir dalan neebe loos.
“Iha Segunda leitura Saun Paulo dehan mai ita, atu ba dame ho Maromak, atu perdua malu no atu fila ba Maromak, tanba Maromak haruka nia oan mane mesak Jesus atu saran aan mate iha Kruz atu salva ita ema no agora tempu ona mai ita, atu ema idak-idak nuudar povu Maromak nia, atu apresia no hatan loos ba Maromak hodi hetan salvasaun,” nia informa.
Nia hatutan, iha evanjelhu Jesus hanorin mai ita iha ai riin tolu, mak harohan, jejum, kuarezma, nee mak knaar loos ba sarani sira nian, ho knaar tolu nee mak sarani sira hodi servi Maromak,” harohan ho ita nia kalmar, halo jejum ho ita nia isin, no fo esmola ba ita nia maluk sira, Jesus koalia katak, ita nia harohan mak relasaun ho Maromak, tanba nee tempu barak liu ho Maromak, jejum tulun ita atu kontrala ita nia aan, jejum tulun ita bele loke matan ba ema sira neebe persiza ita nia tulun, tanba buat barak Maromak haraik ona mai ita,” nia deklara.
Iha fatin seluk, Sarani David Ximenes koalia, saida mak ema bele muda no transforma, loos muda kuantidade hahan ninia no laos muda kualidade hahan nia, maibe muda ema nia fuan no muda hahalok hatudu liu husi liafuan, fuan neebe simu ho realidade ba Maromak nia laran diak, Maromak nia laran luak, tanba kasu ema nia sala hodi terus no mate iha kruz.
“Agora iha tempu kuarezma nee ita mos presiza muda ita nia hahalok aat sira, husi koalia liafuan neebe diak, hatudu hahalok neebe diak no fo sasin ba buat neebe diak, nee mak Maromak nia hakarak,” nia afirma.
(jen)
