DÍLI, STLTIMORLESTE.com — Prezidente Repúblika (PR), José Ramos-Horta reafirma amizade istórika entre Timor-Leste no Brazil, bazeia ba demokrasia, solidariedade no justisa sosiál.
Ramos-Horta hato’o mensajen ba Prezidente Brazil, Luiz Inácio Lula da Silva, iha 27 Outubru 2026, hodi felicita nia ba vitória eleisionál no konfiansa ne’ebé povu Brazil fó ba nia lideransa.
Prezidente konsidera rezultadu eleisaun nian nu’udar momentu signifikativu ba demokrasia brazileira, ne’ebé reflete partisipasaun sivika no vontade soberana povu liuhosi votasaun.
“Ha’u hato’o parabéns sinseru ba Ita-Boot nia vitória iha eleisaun prezidensiál Brazil nian no ba konfiansa foun ne’ebé povu Brazil tau iha Ita-Boot nia lideransa,” deklara Ramos-Horta.
Nia espresa esperansa katak mandatu foun sei hametin instituisaun sira, koezaun sosiál no dezenvolvimentu inkluzivu no sustentável iha Brazil.
Ramos-Horta afirma katak nasaun rua fahe ligasaun istóriku amizade nian, lian komún no valór fundamentál sira, inklui demokrasia, solidariedade no justisa sosiál.
“Ha’u konvensidu katak ligasaun sira-ne’e sei kontinua sai baze sólidu hodi aprofunda kooperasaun bilateral iha buka dame, dezenvolvimentu no multilateralizmu,” afirma Prezidente.
Iha remata mensajen, Ramos-Horta renova nia parabéns ba Lula da Silva no hato’o dezeju di’ak ba susesu iha ezersísiu responsabilidade prezidensiál, no ba dame no prosperidade povu Brazil nian.
Prezidente remata ho liafuan diplomátiku, hodi reafirma konsiderasaun aas ba Prezidente Brazil.
(eme)
