JAKARTA, STLTIMORLESTE.com — Timor-Leste (TL) no Indonézia kontinua buka pontu komún atu hetan akordu fronteira marítima justu, tuir direitu internasionál.
Negosiasaun ronda da-4 hala’o durante loron tolu, hahú 1 to’o 3 Setembru 2026, iha Jakarta, Indonézia.
Informasaun ne’e STL asesu liuhosi Media Gabinete Primeiru-Ministru (GPM), Kinta (03/09/2026).
Xefe Gabinete Primeiru-Ministru no Diretora Ezekutiva Gabinete Fronteiras Terrestres no Marítimas, Elizabeth Exposto, lidera delegasaun Timor-Leste.
Elizabeth hateten ronda da-4 kontinua diskusaun hosi ronda da-3, ne’ebé hala’o iha Singapura, iha Abril 2026.
“Ami mai iha Jakarta hodi hala’o negosiasaun fronteira marítima ho Indonézia, kontinua diskusaun hosi ronda da-3 iha Singapura,” hateten Elizabeth.
Ronda dahuluk hala’o iha Dili, iha Agostu 2025, ronda daruak iha Jogjakarta, iha Dezembru 2025.
Enkuantu ronda datolu hala’o iha Singapura, iha Abril 2026, antes ronda da-4 ne’ebé agora hala’o iha Jakarta.
Elizabeth esplika, diferensa hosi ronda da-3, Timor-Leste sai uma-na’in, enkuantu Indonézia simu responsabilidade uma-na’in ba ronda da-4.
Ronda da-4 mós sai primeira enkontru Elizabeth ho xefe delegasaun foun Indonézia, Embaixadór Ricky Suhendar.
Ricky Suhendar troka Laurentius Amrih Jinangkung, ne’ebé agora hala’o knaar nu’udár Embaixadór Indonézia ba Olanda.
“Ida-ne’e primeira véz ha’u enkontru ho kontraparte foun iha negosiasaun ne’e, Embaixadór Ricky Suhendar,” dehan Elizabeth.
Elizabeth hateten negosiasaun fronteira marítima la’ós prosesu simples, tanba envolve aspetu jurídiku, tékniku no polítiku.
Aspetu sira ne’e inklui lei internasionál, lei tasi nian, mapeamentu no jeografia, ne’ebé presiza diskusaun kle’an.
“Diskusaun presiza hala’o ho kuidadu, kompriende pozisaun Indonézia no esplika pozisaun Timor-Leste,” hateten Elizabeth.
Nia subliña, objetivu prinsipal mak buka pontu komún no hakbesik pozisaun nasaun rua kona-ba fronteira marítima.
Elizabeth afirma delegasaun rua hatudu nafatin vontade no kompromisu atu buka solusaun ne’ebé justu no tuir direitu internasionál.
Nia mós hateten diskusaun ronda da-4 la’o di’ak, ho delegasaun rua kontinua negosiasaun iha espíritu kooperasaun no kompromisu mútu.
Reuniaun tuirmai está previstu hala’o iha Dezembru 2026, iha Timor-Leste, ne’ebé sei sai uma-na’in.
Depois remata ronda da-4, delegasaun Timor-Leste sei fila ba Dili atu halo preparasaun no simu orientasaun hosi Primeiru-Ministru Kay Rala Xanana Gusmão.
Primeiru-Ministru Xanana nafatin akompaña prosesu negosiasaun no fó apoiu, orientasaun no motivasaun ba delegasaun Timor-Leste.
Elizabeth hato’o agradese ba Primeiru-Ministru tanba nafatin fó apoiu no akompañamentu durante prosesu negosiasaun fronteira marítima.
Iha remata ronda da-4, xefe delegasaun Timor-Leste no Indonézia asina hamutuk minutas reuniaun no entendimentu sira.
Dokumentu sira ne’e sei sai parte hosi prosedimentu no arkivu ofisiál ba nasaun rua.
(jos)
